Auff den Sontag deß Barmhertzigen Vaters

Sol dich der Höchste Gott mit Vater Treu anblicken So must du iede Zeit voll sanffter Geister seyn Wer nichts als richten kan/ wer Rach' vnd grimmer Pein Stets auff den Nächsten rufft/ wird endlich in den Stricken Deß Sathans/ in dem Strom der Schwefelbach/ ersticken Gnad ist vmb Gnade feyl, wer gibt nimm't häuffig eyn. Vnd wie dein Maß: so voll/ so richtig/ fest vnd rein Wird man auff deine Schoß auch die Gewehre schicken. Wer Laster straffen wil vnd selbst verbrechen liebt/ Gleicht dem/ der blind die Faust/ als Leiter/ blinden gibt. Wilst du ins Brudern Aug auch keinen Splitter leiden/ So fange bey dir an/ vnd nim die Balcken hin/ Die Balcken die dir selbst verdunckeln Aug vnd Sin/ Vnd fleuch diß selbst/ was du lehrst deinen Nächsten meiden.