092

Por olvidar la coyta, tristesa, et pesar rogué a la mi vieja, que me quisiese casar: fabló con una mora, non la quiso escuchar; ella fiso buen seso, yo fis' mucho cantar.

Dixo Trotaconventos a la mora por mí: «Ya amiga, ya amiga ¿quánto ha que non vos vi? non es quien ver vos pueda ¿cómo sodes ansí? Salúdavos amor nuevo». Dixo la mora: «Ysnedri.»

«Fija, mucho vos saluda uno, que es de Alcalá, envíavos una çidra con aqueste albalá, el Criador es convusco, que d'esto tal mucho ha, tomaldo, fija señora.» Dixo la mora: «Le alá.»

«Fija, si el Criador vos dé pas con salud, que non gelo desdeñedes, pues que más traer non pud', aducho bueno vos adugo, fabladme a laúd, non vaya de vos tan muda.» Dixo la mora: «Asaút.»

Desque vido la vieja, que non recabda y, dis': «Quanto vos he dicho bien tanto me perdí, pues que ál non me desides, quiérome ir de aquí.» Cabeçeó la mora, díxole: «Amxy, amxy.»