103

Señores, dat al escolar, que vos vien' demandar,

dat limosna, o raçión, faré por vos oraçión, que Dios vos dé salvaçión, quered por Dios a mí dar.

El bien que por Dios fesierdes, la limosna que por él dierdes, quando d'este mundo salierdes, esto vos avrá de ayudar.

Quando a Dios dierdes cuenta de los algos, et de la renta, escusarvos ha de afruenta la limosna por él far.

Por una rasiún que dedes, vos çiento de Dios tomedes, et en paraíso entredes, ansí lo quiera él mandar.

Catad que el bien faser nunca se ha de perder. Podervos ha estorçer del infierno mal lugar.

Señores, vos dat a nos esculares pobres dos.

El señor de paraíso Christus, que tanto nos quiso, que por nos muerte priso, matáronlo jodíos.

Murió nuestro Señor, por ser nuestro Salvador, dadnos por él su amor, si él salve a todos nos.

Acordatvos de su estoria, dad por Dios en su memoria, si él vos dé la su gloria, dad limosna por Dios.

Agora en quanto vivierdes, por su amor siempre dedes, et con esto escaparedes del infierno e de su tos.