Wie solte ich armer der swere getruwen

Wie solte ich armer der swere getruwen dc mir ze leide· der kúnic were tot des mv̊s ich von ir dc ellende buwen des werdent da nach minú ǒgen vil rot der mir zepúlle die heruart gebot der wil mich scheiden von liebe in die not der ich gewinne vil micheln rúwen

Ich wil bevelhen ir lib vnd ir ere gote vnd da nach allen engeln sin si sol wissen swar ich landes kere dc ich ir bin vnd iemer min als ich ie was do mich ir ǒgen schin brahte so verre vs dem sinne min do wc mir we vnd nv michels mere

Nv mv̊s ich varn vnd doch bi ir beliben von der ich niemer gescheiden mac si sol mir sin vor allen andern wiben in minem herzen beidú naht vnd tac als ich gedenke wie ich ir wilent pflac owe dc púlle so verre ie gelac dc wil mich leider von fröiden vertriben