Owe das ich si îe gesach

OWe das ich si îe gesach dú mir das herze hat betwungen von der so lide ich vngemach der ich dike han gesvngen des sol si mich geniêssen lan Wil si trúwe an mir erzeigen ich was ir ie vil vndertan vnd búte mich der vil schonen ze eigen

OWe das ich nv scheiden sol von liebe dast gros vngevelle das scheiden tv̊t mir niht ze wol wem lastv mich trut geselle so we der iamerlichen not das wir vns lebendic mv̊ssen scheiden nv kvm vil grimmeclicher tot vnd rihte gote von vns beiden

Do ich dem babste des veriach vnd aller miner missetete vnd er an minem brieve sach ich minne ein wib mit ganzer stete âne wandel ist ir lib got der was vil senftes mv̊tes do er geschv̊f so reine ein wib in gesach nie niht so gv̊tes