Psal. 128. Beati omnes qui

Wol dem, der lebt in Gottes forcht nach seinem willen, Auff rechtem weg seim wort gehorcht, das zu erfüllen! Dem wirt der HERRE gnug beschern vnd sol sich nehrn der arbeyt seiner hende.

Es wirt sein weib gantz fruchtbar sein vnd freundtlich leben, Gleich eim weinstock vol trauben fein an schönen reben, Vnd seine kind vmb seinen Tisch frölich vnd frisch gleich wie die Olizweige.

Sih, also segnet Gott den man der jm vertrawet, Leßt jn keyn not noch mangel han, wer auff jn bawet, Vom HERRN wirt jm der segen schon, auch auß Zion wirt er sein ewig walten.

Er wirt sehen groß glück vnd heyl vber Isral, Des HERREN gunst wirt jm zu theyl mit freuden viel, Daß Er sein gschlecht zu kindeskind sein lebtag sind, so wirt jn Gott erhalten.

Dafür sol ewig danckbar sein die Christlich gmein, Gott Vatter in seim höchsten thron vnd seinem Son, Dem heylgen geyst vnd waren Gott, der vns solchs hat durchs Wort gwölt offenbaren.