“Frondes Est Ubi Decidant.”

FRONDES est ubi decidant, Marcescantque rosæ flatu Aquilonio: Horis astra cadunt suis; Sed, Mors, cuncta tibi tempera vindicas.

Curis nata virûm dies; Vesper colloquiis dulcibus ad focum; Somnis nox magis, et preci: Sed nil, Terrigenum maxima, non tibi.

Festis hora epulis datur, (Fervens hora jocis, carminibus, mero;) Fusis altera lacrymis Aut fletu tacito: quæque tamen tua.

Virgo, seu rosa pullulans, Tantum quippe nitent ut nequeant mori? Rident te? Neque enim soles Prædæ parcere, dum flos adoleverit.