Gedanke die sint ledic fri

Gedanke die sint ledic fri dc in der werlte nieman kan erwenden da ist ǒch dike senen bi die mv̊s ich von dem herzen ofte vnsanfte senden ein rehtiv liebe mich betwanc dc ich ir gap das herze min des werdent mir dú iar so lanc sol ich von der gescheiden sin das wene min leben iht lange ste ich verdirbe in kvrzen tagen mir tůt ein scheiden also we

Ich súfte vnd hilfet leider niht vmbe ein wib bi der ich gerne were so si min ǒge niht ensiht dc sint dem herzen vil leidú mere ir tugende die sint valsches vri des höre ich ir die besten iehen nv sehent wie minem herzen si ich getar ir leider niht gesehen wie seneliche si mich lie dc geschach mir e· von wibe nie

Ich han der fröiden vil verlan dc ich niht herzelieb vinden kvnde swc ich fröiden ie gewan dc ist wider dise liebe ein krankú stunde die ich zeliebe mir erkos sol ich der so verteilet sin seht des belibe ich fröidelos vnd wirt an minen ǒgen schin in alder werlte ein schöne wib vil gar ir eigen ist min lib