Sich hat verwandelt dú zit

Sich hat verwandelt dú zit· dc versten ich bi der vogel singen· geswigen sint die nahtegal si hant gelan ir svͤsses klingen· vnd valwet oben der walt· ie noh stet dc herze min in ir gewalt· der ich den svmer gedienet han· dú ist min froͤide vnd al min lieb ich wil irs niemer abe gegan·

Ich mv̊s von rehten schulden hoh tragen dc herze vnd alle die sinne· sit mich der allerbeste man verholn in sime herzen mīne· er tůt mir grôsser sorgen rat· wie selten mich dú sicherheit geruwen hat· ich wil im iemer stete sin· er kan wol grôsser arbeit gelonen nach dem willen min·

Ich bin ein bote her gesant frǒwe vf mange dine guͤte· ein ritter der dich hat erwelt vs al der werlte in sin gemvͤte· er hies dir klagen sin vngemach· dc er ein senendes herze treit sit er dich sach· im tůt sin langes beiten we· nv reden wirs an ein ende enzit ê im sin froͤide gar zerge·

Der got der al die welt geschaffen hat der gebe der lieben noch die sinne· das si mich mit armen vmbevahe vnd mich von rehten herzen minne· mich dvnkent ander frǒwen gůt· ich gewinne von ir dekeiner niemer hohen mv̊t· sin welle genade enzit began· dú sich da sv́ndet an mir vnd ich ir vil gedienet han·