»Eh du gehst in dein Bett hinein«

Eh du gehst in dein Beth hinein/ Laß dir/ was folgt befohlen sein. Auff beyde Knie demüthig fall/ Danck Gott vmb sein Gaben all. Schlag auff/ vnd diese Gaben such/ Jm Hertzen/ deinem Rechenbuch.

Vmb himlisch Liecht auch bitte sehr/ Daß offenbahr was heimlich wehr. Das Liecht dir zeigt ohn Kertz vnd Brill/ Was eigen Lieb verberg will. Wen Gott erleucht/ hat scharpff Gesicht/ Solch Augen hat kein Adler nicht.

Laß kommen her bey diese Kertz/ Die Händ/ den Mund/ das gantze Hertz. Thu beyde Augen wacker auff/ Durch alle Winckel hurtig lauff. Von einer Stundt zur ander geh/ Auff all dein Thun vnd Lassen seh.

Such alles auff/ bring alles für Vnder der Banck/ hinder der Thür. Dein Wort vnd Werck leg auff die Wag/ All dein Gedancken vberschlag. Der Sünden zahl auch fleissig merck/ Mit Vnterlassung guter Werck.

Die Sünd die du gefunden hast/ Bewein/ vnd leg bald ab den Last. Bitt Gott vmb so viel Zeit vnd Frist/ Biß daß gebeicht die Sünde ist. Ein Todtsündt zwar macht greiß graw Haar/ Wer denckt der Sünden groß Gefahr.

Hie mach ein Fürsatz starck vnd fest/ Die Sünd zu meyden auff das best. Nach Besserung geh Weg vnd Steg/ All Vrsach auß den Füssen leg. Sein Beyn brach Hanß auff glattem Eyß/ Bleib du vom Eyß/ so bistu weiß.

Jetzt dein Gebett zu GOtt außgieß/ Vnd also das examen schließ. Thu täglich Buß vor deine Sünd/ Was der Beichtvatter dir vergünnt. So legt man ab mit kleiner Buß/ Jm Fegfewr was man büssen muß.

Ein Kesselein da hangen soll/ Deß Heyligen Weywassers voll. Daß Heylig Creutz mit diesem mach/ Daß von dir weich der höllisch Drach. Ein Agnus Dei, auch bey dir trag/ Alsdann nichts nach der Höllen frag.

Nun wann du legst die Kleyder ab/ So denck wie bloß man geh zum Grab. Lösch auß das Liecht vnd denck dabey/ Wie bald der Mensch gestorben sey. Geh züchtig ein: Wol deck dich zu/ Vnd auff dem Creutz ruh mit Iesv.