Ein Christliche Seel

O trawrigkeit deß hertzen/ Wan wirstu nemmen ab? Aprill kombt auff den Mertzen/ Der winter geht zu grab. Natur war auch im schmertzen Den trüben winter-tag/ Nun wend sie sich zum schertzen Allweils die zeit vermag.

Die vöglein schön erklingen/ Die Sonn sich strälet auff/ Die kühle brünlein springen/ Die bächlein seind im lauff. Die blümlein zart erspriessen/ Zur Erden kriechens auß/ Laub/ graß/ herfür auch schiessen/ Die pfläntzlein werden krauß.

Ade last trawren fahren Zur wilden wüst hinein/ Bald wagen her/ vnd kahren Lad auff all qual/ vnd pein/ Führt hin so schnöde wahren Weit auß dem hertzen mein/ Wil fröligkeit nit sparen Beym lieben Sonnen-schein.

Ey wer doch wolt verlieren So schöne Frühlings zeit? Weil doch melancoliren Hilfft warlich nit ein meit. Ich heut noch will spatziren Zum nechsten grünen waldt/ Vnd da dan musiciren/ Daß lieblich widerschallt.

An einem holen Felsen Sich last ein Täublein sehn/ Ein Creutzlein thuts vmbhälsen Heist büssend Magdalen. Pflegt lieblich offt zu spielen Auff diesem Psälterlein/ Daß nie so süß bey vilen Noch harpff/ noch Cither seyn.

Mit jhr will ich dan singen Dem lieben Gottes Sohn: Mehr lust es mir wird bringen Alß aller ander thon; Im Creutz allein/ mag sagen/ Ist frewd/ vnd fröligkeit: Wers wil mit JESV tragen/ Find endlich süssigkeit.

Wolauff/ wolauff/ im herren Ich wil recht frölich seyn. In weltlich schrey/ noch plerren Mag ich nicht stimmen ein. All meine frewd verborgen In JESV seiten ligt/ Da find ich heut/ vnd morgen Noch manches rein gedicht.

Mein harpff/ so mir wil schlagen/ Mein geig/ vnd cither-sang/ Mein lied in frewden-tagen/ Mein Laut- vnd psalter-klang Sol sein als lang ich lebe/ Creutz/ nägel/ speer/ vnd blut/ Biß ich mein seel auffgebe Bleibt mir wol solcher muth.

O Creutz gar schön gezieret Mit JESV meinem lieb! Wer stäts bey dir psalliret/ Wol stäts in frewden blieb. Möcht nur zu dir ich steigen Ein Music richten an! Zwar vber alle Geigen Es müßt in warheit gahn.

Kom nur auß deinem steine/ Du büssend Magdalen/ O Täublein daß ich meine/ Dich laß nur kecklich sehn. Vns laßt nun musiciren Mit hellem frewden-thon/ Vns last nun jubiliren Dem lieben Gottes Sohn.

In frewden wil ich leben/ Der winter ist fürbey: Die sünd mir seind vergeben/ Bin frisch/ vnd vogel-frey. O wol/ vnd wol der stunde/ So mich zur buß gebracht/ Daß nit ich gieng zu grunde Hat JESV Creutz gemacht.

Nit lang/ nit lang mags wehren In diesem jamerthal/ In eyl sich wird verzehren All meiner stunden zahl. Warumb wolt ich dan klagen/ Weil doch in ewigkeit Nach diesen kurtzen tagen Die frewd ist vns bereit?

Hab ich schon waß verlohren Auff dieser schnöden erd/ Ichs dort gantz außerkohren Bald wider finden werd; Auff/ auff dan/ laßt erschallen All frewd/ vnd fröligkeit/ Dem Herren wirds gefallen Fort/ fort/ O trawrigkeit.