La balonada. Satira giornalistica in sestine milanesi di G.C

La Bosinada sora i trii balon Che hân mandaa in aria i noster Giornalista, L’è on dielegh faa ona sira sul Bastion, In tra el Gioeu pelatee e ’l Pepin brumista, El cunta el Pèpp come se l’hin cavada I balonista con la Balonada

GIOEU Voi, Pèpp, dimm su com lè andada injer La scènna di balon, ch’hân mandaa in l’ari Quej di giornai del Sècol e ’l Corrier; Mi hoo poduu minga andagh, ma el Gingiovari L’ha dii che l’è staa un fisch e per depù Che i trii balon stentaven a andà sù.

Lu ch’el s’intend in pont a sgonfiadûr Perchè el ghe sgonfia lù i ball al Pirell, L’ha ditt che in quant a pubblich l’era on mur, Ma in tutt el rest no gh’era nient de bell, Che già quell sur del Brumm l’è on gran tripee, E el var nagòtt in fatt del sò mestee.

PEPP Ma diggh al Gingiovari, el mè car Gioeu, Che l’è on gran ciciaron paccia pancott, Che l’è on tapôn, intregh, compagn d’on boeu, E su sti robb el sà pròpi nagott, Che quand el parla lù non l’è alter bôn Che a fà, te m’hee capii, andà giò el balon.

Diggh de cambià mestee, ch’el sarà mej, Diggh de fà el bragherista a sto andeghee, Che invece desgonfià, el farà di ghej A negozià de bind e de braghee!… Ma andemm, tajèmm su curt sora sto affari, E dèmegh minga ascolt al Gingiovari.

T’el diroo mì el mè Gioeu come l’è andada: L’è staa on spettacol, on spettacoleri! Soffegament a part e ona sudada, Gh’era de vess content propi sul seri; E se disi di coss che hin minga vera, Domandeghel al proto de la Sera.

Quell ch’è staa faa, cred pur, t’el disi mì, L’è staa faa ben, de fioeu che ghà la pratega, E ch’hin ben aveduu in sti afari chì; De gent che ghà in sacoccia la gramatega, Che sà el sò cunt e cont dò parolètt, La sà daggh el color ai sò polpètt.

GIOEU Soo ben o Pepp che l’è on gran ligeròtt El Gingiovari, on fioeu senza costanza, Nè tì nè mì, ch’el vâr pròpi nagòtt Che no’l sa cosse l’è Perseveranza, On strasa Temp on vero paccia zupp, Nò de la nôstra Lega, on ver galupp.

E mì che sont Osservator diroo, (Mì, che me scappa nient sora sti affari, Perchè pensi e ragioni cont el coo, E nò coi pee, compagn del Gingiovari) Diroo che quand sè a contra ai Giornalista, Bisogna faggh el largo in su la pista.

Nun che in Comercio semm come se fà, Stemm minga a guardà tanto per la qual, Che prima de dà adoss a criticà, Cuntom tant grann de mej de fà on quintal. Ma andemm Peppin, ti cuntom su la scèna, Come l’è andaa el spettacol de l’Arèna.

PEPP Ghè staa per primm de tutt ona sfilada De biciclett, tomobil d’ogni sort, Ch’han faa intorna a l’Arèna ona girada, Andand innanz e indree, per drizz per stort, Fasend vedè come spalsand register Se pòda fà scappà fina i Minister.

Dopo de quest ghè staa on equilibrista, Roba de trà li ciocch, de sbalordì; Specialitaa anca lee di Gornalista Per filà via drizz drizz in trà el nò e ’l sì. E sto esercizi a tucc l’ha dimostraa Che a fà i giornaj ghe voeur abelitaa.

Perchè el giornal l’è lu che al dì d’incoeu El dà la storta ai chiffer e ai penser, Ai mod e a tanti coss, car el mè Gioeu! Hin semper i giornai che dà i parer; I giornalista hin tucc omen de pês Che sânn taccà el picòll anca ai scirês.

Ma sent adess el pont pù interessant, El pont el pussee bèll de sta gran festa. Intanta che boffava i musicant, S’hin miss i balonista in la soa zesta, S’è daa el segnal de la partenza e: molla! Intant che la sbatteva i mân la Folla.

Stentaven i balôn a andà perari Sì quest l’è pròpi vera a fina chì Mì ghe doo minga contra al Gingiovari, Ma su sto câs no gh’era nient de dì. E te la diroo mì la gran reson Perchè stentaven a andà sù i balôn.

Portaven gent de pês, di barbelati Coi pee de piomb e cont el coo quadraa! E tra quist chi gh’era anca el Carugati, Quell tâl ch’emm vit insemma l’ann passaa, Quell’inscì alegher quand l’è in compagnia, Quell che fa el critegh in la Lombardìa.

GIOEU El Carugati? qual? quell smingorlin Quell tal sciccon che par ona cartina? E che ghe disen tucc «el figurin De la gran moda inglesa e parisina»? Quell ristocrategon pien de danee Che cred ch’jalter sien sta stampaa coi pee?

PÈPP Ma nò, che scicch d’Egitt, che ristocrategh, L’è on bombason d’on omm inscì a la man, Minga ambizios e poeu tant democrategh. Chi no le cognoss minga chì a Milan Quell che gh’è mort la scimbia soffegada Quand ghè capitaa in cà ona brusattada?

GIOEU Adess ghe sont, sì quèll scavion frances! Immaginass, segura già, l’è on fatt, Come se fà a portà inscì tanto pês? On pês de quella sòrt, ma te see matt? Acqua de bellegott, lu come nient El pò mandamm a fond on bastiment!

PÈPP Ben damm ascolt o Gioeu, sent sta scenetta Che ghè success trà i noster Viaggiator: Me l’ha cuntada vun de l’Italietta Che l’è sincer e minga sgonfiador. Se le sà l’Omm de prèja e anca el Guerin Ne fânn foeura on articol de quij fin.

Quand el balon a on tratt el s’è fermaa, E ghera minga vèrs de fall’alzà, El Capitani, svelto, l’ha svojaa Di sacch de sabbia, come s’ha de fà In de stì circostanz, ma giò e poeu giò, O sì, el balon el se moveva nò.

A on tratt el Capitani el batt sui spall Del Carugati e el dis: Su vitt alôn, Abasso la zavorra, il fò svojall, Il fò butté anca vou monsù, cranon! — — Ohj là, coman? ma per chi el ma ciapaa, L’è matt, nespà?, respond el Carugaa;

A moà zavorra? hoo de buttamm giò mi? — Ma nò, ma nò el me car monsù, vou avé El Capitani el dis — Pà bien comprì; Ho dii domà che pour pouvoar monté Il fò butté la sabbia, butté la Anca vou e inscì el balon el se alzarà.

Varda mò ti cosse saria succèss In quell moment s’el noster Milanês No el farloccass frances; oh che smargèss! Sta cert o Gioeu che tra quest chi e ’l Frances Saria passa ona scènna de tal sòrta De regordà el Bongee de Carlo Porta.

S’ ciao, sligerii el balon, juttaa dal vent, I noster balonista s’hîn trovaa Vesin a Cornared in d’on moment; Ma essend ch’el Sol l’era già tramontaa, El padron del balon, Monsù Loran, L’ha ditt: il fò andà giò e tornè a Milan.

El Capitani el dèrva foeura el boeucc Che ghe dà sfogh al gass e el gran balon Col remollà, el va giò in d’on batter d’oeucc. Atent me car amì, nou dessandon, Ciappé la corda e lassé fèr a moà Che in d’on moman nou som a tèr tou troà.

Sigura in troà, perchè, se no l’hoo dii Prima, te’l disi adèss che i balonista Di sciansc eren no domà in duu, ma in trii, Che ghera insemma on alter giornalista, On redattor del Secol, avocatt On bombason de vun, miga resiatt.

Tòcca in terra la zèsta, e adree el balon A sora quella in del bell mezz d’on praa! El Capitani, svelt, el fà on salton E el resta in pee, ma quij alter duu imbrojaa Per l’ingarbij di cord e el colp avuu, Vann là coi gamb perari tutt e duu,

El pover avocatt l’è sanguanent, El Carugati anch lu l’è in sanquintin E el perd el sangu per on sgarbellament.— — Bindaa i ferii e faa sù el balon, infin Hin tornaa a cà sti pover ost bagaj, Con l’otomobil ch’era andaa cercaj.

GIOEU Cossa te cuntet mai, ma guarda mò Che scènna bolgirada, che sconquass! Ch’el sia pur bèll andà in balon… però Mèj gòdel nò sto bèll, che andà a coppass. — Ma dimm, va ben sul viagg ch’hân faa quist chi, Ma quj alter duu dov’hin andaa a fenì?

PÈPP In quant al Brumm ghè succeduu nagòtt, Ma al Genoves la ghè toccada brutta. Figuret che ghè staa di balabiòtt, (E incoeu a fa de sti scènn la ghe voeur tutta) Ghè staa di villanzon che l’han brancaa, Ghan tolt tuscoss e poeu l’haan malmenaa,

E l’è on miracol se se l’è cavada In del rebuttament de sto bodesg, Senza ciappass sui spall ona rolada, Staghela lì, o quajcoss de pussee pesg. Varda mò tì che porchi de paisân, Che brutt figur che ghe fânn fà a Milan!

GIOEU Te vedet Pepp, se pò minga daggh tort; Siccome vèmm dree a dì che i giornalista, Sia a ciappaj per el drizz che per el stòrt, Hin tucc ona missolta de balista, Vedend a rivann vun cont quell balon, L’è natural se han faa la rëazion.

PÈPP Nò, nò car el mè Gioeu, speccia on moment, L’è propi nò come t’el penset tì. Te voeu savè cosse l’è staa el movent Che ha scaldaa el coo al villan? t’el diroo mì: L’è staa per fass pagà centuplicaa I verz che col balon han spettasciaa.

Domenedia però in l’istessa nott, L’ha castigaa quij porchi de villan, Mandand acqua e tempest a rebelott, E vent e poeu on frècc tâl che meneman Pareva el fuss cambiaa l’estaa in inverna. E t’hee veduu anca tì che temp d’inferna.

GIOEU Sont nò del to parer car Peppinett, Credi putost ch’el cêl l’abbia reagii Coi Giornalista, per el gran spaghett Che rivaa quist in cêl e ingaluzzii, Menassen gramm, pientand poeu di garbuj, Mettend magaria i nivol in surbuj.

PÈPP Sarà come te diset tì, el sarà, Ma vist el risulta, vorissi dì Ch’el saria el câs de mettes a studià, Quajcossa cèrt se podaria ottegnì, E podariss succed che on quaj scienziaa L’avèss de trovagh dent on ritrovaa.

GIOEU O’ cert, te vedaree che on bell moment, Per scongiurà i tempest e menà frecc, Fa pioeuv o fa fioccà, sicur la gent, La scartarà tucc i sistèma vecc, E tutt la ottegnarà senza oraziôn Mandand i Giornalista in del balon.

FENIDA.