Sol von minnenklichem wibe

Sol von minnenklichem wibe mir vil senden man niht swere werden bůs von ir trütelehten libe wart mir nie wan dc ich nah ir süften mv̊s von der ich den schaden han pfligt gegen mir niht steter trúwen des wil ich an ir lachen mich niht mere lan

Mir were doch das leben swere troste mich ein anders liebes trösten niht wan ich weis dú inren mere dc die liben nieman wan in eren siht vro mich doch ein trösten tůt lide ich not an meinem libe mit gedulde· dast mir an der sele gůt

Was sol ich ir mere kúnden wan das si an den trúwen mich verderben lat si wil sich an mir versúnden wissent dc es iemer vf ir sele stat alles wandels ist si vri swie si mich an fröiden irre got si mir als ich der herzelieben si

IR vil frölich stenden ǒgen dú hant so verseret mich vil senden man dc wil nieman mir gelǒben da ist ǒch der vngetrúwe schuldig an dc ist ir rosevarwer mvnt den si vf minen schaden spiset der hat an dien gantzen trúwen mich verwunt