Vns ist zergangen

Vns ist zergangen der lieblich svmer da man brach blůmen da lit nv der sne mich mv̊s belangen wenne si minen kvmber welle vol enden· der mir tv̊t so we ia klage ich niht den kle swenne ich gedenke an ir wiblichen wengel dú man zefröide so gerne ane se

Seht an ir ǒgen vnd merkent ir kinne seht an ir kele wis vnd prüuent ir mvnt si ist ane lǒgen gestalt sam dú minne mir wart von frowen so liebes nie kvnt ia hat si mich verwunt sere in den tot· ich verlúse die sinne genade ein kúniginne dú tů mich gesvnt

Die ich mit gesange hie prise vnde kröne an die hat got sinen wunsch wol geleit in gesach nv lange nie bilde also schöne als ist min frowe des bin ich gemeit mich fröit ir werdekeit bas danne der meie vnd alle sin döne die die vogel singent dc si iv geseit