Ach der ich ob allen frowen

Ach der ich ob allen frowen vf mins endes zil dienen wil dú hat ane schvlde verhowen mich sere vf den tot ach der not Ach vf genade swie si mir tv̊t habe ich mv̊t gv̊t· lib vnd leben ir ergeben

Ich wolt ir mit rede bescheiden wc ich herzeklage von ir trage si tet als ich were ein heiden ach min fröide seig ich gesweig Ach vf genade swie si mir tv̊t habe ich mv̊t gv̊t· lib vnd leben ir ergeben

Sit min frowe die ich kröne rede mir senden man niht engan minen kvmber ich ir döne swar ich landes var offenbar Ach vf genade swie si mir tv̊t habe ich mv̊t gv̊t· lib vnd leben ir ergeben

Ir vil spiegel liehten ǒgen hant verseret mich herzeklich ich mv̊s sterben· svnder lǒgen ach ir mv́ndel rot tv̊t mih tot Ach vf genade swie si mir tv̊t habe ich mv̊t gv̊t· lib vnd leben ir ergeben

Swie si mit gewalt mich twinge mih kan wenden niht kein geschiht ich mv̊s iemer vf gedinge sin ir eigen kneht das ist sleht Ach vf genade swie si mir tv̊t habe ich mv̊t gv̊t· lib vnd leben ir ergeben