Ich wil ivngen kinden raten

ICh wil ivngen kinden raten dc si balde fröwen sich da wir ê den rifen traten da ist nv gar wūneklich da entspringent blv̊men vnd kle kalde rifen vnd sne sint zergangen aber als e

Ich wil miner frowen mv̊ten dc si mir genedic si der vil reinen der vil gv̊ten wer ich gerne nahe bi liesse eht mich ir vngefüger nît der mir also nahe lit fröiden si mich rǒbet zaller zit

Werder reiner wibe minne machet fröiderichen mv̊t des bin ich wol worden inne dc nie wūne wart so gv̊t als ich mich versinnen kan son enwirdet niemer man rehte fro der minnen nie began

Mines libes ǒgenweide dast dú liebú frowe min sol ich iemer komen von leide dc mv̊s an ir hulden sin dc si spreche ich bin dir holt dc wer mir ein richer solt vnd nême es fúr des keisers golt