« Tu accuses la mort des tourmens rigoureus »

Tu accuses la mort des tourmens rigoureus Que tu souffre en mourant, & si ne considere Que tu as bien souffert de douleur plus amere, Estant encore esclave en ce cors langoureus :

Commencant en langeur ton àge douloureus, Tu les parfaits en pleurs, & finis en misere La vie, & non la mort de tes maus est la mere, Qui te rend en mourant, & vivant mal-heureus :

Le bout, & non le bort de nostre foible route Est-ce qui nous tourmente, & fait que l'on redoute L'inevitable loy du tems, & du destin :

Ne t'esmerveille donc, puisque nostre souffrance Vivant avecque nous, avecque nous commence, Si le soir de nos jours, ressemble à son matin.