À la lune

Ô Bel œil de la nuict ; ô la fille argentée, Et la sœur du Soleil : & la mere des mois : Ô princesse des monts, des fleuues, & des bois : Dont la triple puissance en tous lieus est vantée. Puisque tu es, Deesse, au plus bas Ciel montée, D’où les piteus regrets des amants tu reçois ; Di, Lune au front cornu, as-tu veu quelque fois Vne ame qui d’Amour fust si fort tourmentée ? Si doncques ma douleur vient ton cœur esmouuoir, Tu me peus secourir ; ayant en ton pouuoir Des songes emplumez la bande charmeresse. Choisi l’vn d’entre tous qui les maus d’vn amant Sache mieus contrefaire, & l’enuoie en dormant Representer ma peine à ma fiere maistresse.