Best to Be Blyth

Full oft I muse and hes in thocht How this fals warld is ay on flocht, Quhair nothing ferme is nor degest; And quhen I haif my mynd all focht, For to be blyth me think it best.

This warld evir dois flicht and wary; Fortoun sa fast hir quheill dois cary Na tyme but turne can tak rest, For quhois false change suld nane be sary, For to be blyth me think it best.

Wald man considder in mynd richt weil, Or Fortoun on him turn her quheil, That erdly honour may nocht lest, His fall less panefull he suld feil. For to be blyth me think it best.

Quha with this warld dois warsell and stryfe, And dois his dayis in dolour dryfe, Thoch he in lordschip be possest, He levis bot ane wretchit life. For to be blyth me think it best.

Of wardlis gud and grit richess Quhat fruct has man but mirriness? Thoch he this warld had, eist and west, A were povertie but glaidness. For to be blyth me think it best.

Quho suld for tynsall drown or dé For thyng that is bot vanitie? Sen to the lyfe that ever dois lest Heir is bot twynkling of an ee. For to be blyth me think it best.

Had I for warld's unkyndness In haist tane ony haviness; Or fro my pleasans bene opprest, I had bene deid langsyne doubtless. For to be blyth me think it best.

How evir this warld do change and vary, Lat us in hairt nevir moir be sary; But evir be reddy and addrest To pass out of this frawfull fary. For to be blyth me think it best.