Low Down in the Broom

My daddy is a canker'd carle, He'll na twin wi his geir; My minny is a scalding wife Hads a the house a steer. But let them say, or let them do, It's a ane to me, For he's low doun in the broom Waiting for me; Waiting for me, my love, Waiting for me, For he's low doun in the broom Waiting for me.

My aunty Kate sits at her wheel, And sair she lightlies me; But weil I ken it's a for spite, For neer a jo has she. But let them say, &c.

My cousin Madge was sair beguil'd Wi Johny o the glen; And ay sinsyne she cries, Beware Of false deluding men. But let them say, &c.

Gleed Sandy he came west ae night And spier'd when I saw Pate; And ay sinsyne the neighbours round They jeer me air and late. But let them say, &c.