Ich fröwe mich maniger blv̊men rot

Ich fröwe mich maniger blv̊men rot die vns der meie bringen wil die stv̊nden ê in grosser not der winter tet in leides vil der meie wils vns ergetzen wol mit manigen wunneklichen tage des ist dv́ welt gar fröiden vol

Vas hilfet mich dv́ svmerzit vnde die vil liehten langen tage min trost an einer frowen lit von des ich grossen kvmber trage wil si mir geben hohen mv̊t da tv̊t si tvgentlichen an vnd do min fröide wirdet gv̊t

Swanne ich mich von der lieben scheide so můs min fröide ein ende han owe so stirbe ich lihte von leide dc ich es ie mit ir began ich enweis niht frowe wc minne sint mich lat dv́ liebe sere engelten dc ich der iare bin ein kint