Aller selde ein selic wib

Aller selde ein selic wib tů mir so das min herze fro bestê ob ich ie dur dinen lib wurde fro dc des iht an mir zergê ich was ie der dienest din nv bist dv dú fröide min sol ich iemer lieben tac oder naht geleben dc mv̊s frowe an dir geschehen

Frǒwe ich han dvr dich erlitten dc nieman dvr sin lieb so vil erleit ich getar dich niht gebitten noch enkan tůs dvr dine selekeit ich bin din dv solt mich nern vnd gewaltes vor allen wern ich han iemer eine bet dc dv wol gevarst vnd dich baz an mir bewarst

Frowe ich han noch nie getan dvnket mich danne dú liebe mir gebôt ine kvnde nie verlan hort ich dich nennen ine wurde rôt swer do nâhe bi mir stv̊nt so die merkere tůnt der sach herzeliebe wol an der varwe min sol ich da von schuldic sin

Ich verdiene den kvmber nie den ich han wan so vil ob dc geschach dc ich vnderwilent gie fúr dich stan vnd ich dich vil gerne sach lies ich do dc ǒge min tǒgenlichen an das din dc brahte ich vnsanfte dan vnd lihte dar frowe nam des ieman war