Ich tůn mit disen dingen niht

ICh tůn mit disen dingen niht ich trure ein teil ze sere der mich so vil gesorgen siht ich fúrhte er mirs verkere v́bel vnd anders danne wol nvn weis ich was ich sprechen sol wan ich enkan niht mêre

Wilent do man fröún mich sach do wc mir wol ze mv̊te man horte wol das ich do sprach vil manige rede gůte hei wc mannes wc ich do nv wurde ich aber lihte fro der min schone hůte

Verliesent mich die fröiden gernt so hat dú rede ein ende die nv vil lihte min enbernt die windent danne ir hende we dc si als úbel gedenkent min die doch so gv̊t da wellent sin dc sint ir missewende

IN habe in anders niht getan wan dc ich sere sinne dar da ich ie geminnet han vnd noch húte minne owe dc ich des ie began des fúrhte ich vil vnselig man grossen schaden gewinne

We ich bin so gar verzaget deswar ich solt erwinden ich han so vil daher geklaget dc es versmaht den kinden nv mag ich dienen anderswa nein ich enwil min fröide ist da da sol ich si vinden