Es was ein kúnig gewaltig vnd riche

Es was ein kúnig gewaltig vnd riche der sas in einem lande dc wc michel vnd breit sitte pflag er gar vil lasterliche vnd minnet erge tvgende waren im vil leit des gewan er doch dar vmbe michel arbeit er wart vertriben· vnd weise beliben wan dc von im sit ein besser mere wart geseit schǒwa vúr dich schǒwe vnd wart al vmbe dich ich sihe den tagsternen also dvnket mich swer vmb ere welle werben der sol niht svmen sich

Höret wunder wie sol ich gebaren ion ist niht der zehende man· noch wib nv wol gemv̊t ich gedenke die da riche waren dc si dvr got vnd vmb ere teilten wol ir gv̊t da von wc ir lob von allen trúwen wol behv̊t vnd stête· der sam tête dc lobte ich· mir ist leit dc es so lútzel lúte tůt Schowa vúr hin schowe vnd wart al vmbe dich ich sihe den tagsternen also dvnket mich swer vmb ere welle werben der sol niht svmen sich

Dvr torheit ich der werlte erkenne einen man· der lúget vnz im nieman niht gelǒben mag des andern torheit ich ú rehte nenne der tröit vnz in nieman fúrhtet· nahtes noch den tag so ist der dritte vil arg· dest der sele gar ein slag des vierden singêt also hin der toren witze leret vnd er ir selbe nie gepflag Schowa vúr hin schowe vnd wart al vmbe dich ich sihe den tagsternen also dvnket mich swer vmb ere welle werben der sol niht svmen sich

Nv wacha herre balde vnd wirbe vmb ere dc die lúte iht sprechen hin ze dir wie bös ein man gerne maht dv volgen solher lere sit ich dir mit trúwen als wol geraten kan wis eht vrum so gewinnest dv den fromen dar an din ere wahsent sere nieman rehter dir deheines vngelúkes gan Schowa vúr hin schowe vnd wart al vmbe dich ich sihe den tagsternen also dvnket mich swer vmb ere welle werben der sol niht svmen sich