Si iehent dc dv́ minne

Si iehent dc dv́ minne sanfte lone swem si gv̊tes willen si wie wirde ich des inne kan si schone sender sorgen machen vri ia si kan es alles wan dc eine dc si mit ir meine mich niht meinet als ich si gemeinet han

Wie sol ich gelǒben dc dú minne helfe wol von sender not si kan vröide rǒben vnd der sinne swen si hasset dest der tot alse hat si mich gehasset sere nv behalt ir ere vnd füge dc min noch mit liebe werde rat

Minem swerem mv̊te wurde ringe solt ich die vil lieben sehen owe dc dú hv̊te solher dinge mir so lútzel lat geschehen sehe ich si so were ich minen sorgen verre vor verborgen vnd were ǒch minen besten vröiden bi