Ad Librum

SUPER HAC RE AB IPSO LUDI MAGISTRO EDITUM, QUI DICITUR 'PRISCIANUS VERBERANS ET VAPULANS.'

Sordes o tibi gratulamur istas, O Musa aurea, blanda, delicata; O Musa, o tibi candidas, suoque Jam nec nomine, jam nec ore notas: Sacro carmine quippe delinitae Se nunc, o bene nesciunt, novaque Mirantur facie novum nitorem. Ipsas tu facis o nitere sordes. Sordes o tibi gratulamur ipsas. Si non hic natibus procax malignis Foedo fulmine turpis intonasset, Unde insurgeret haec querela vindex, Docto et murmure carminis severi Dulces fortiter aggregaret iras? Ipsae o te faciunt nitere sordes: Sordes o tibi gratulamur ipsas. Quam pulchre tua migrat Hippocrene! Turpi quam bene degener parenti! Foedi filia tam serena fontis. Has de stercore quis putaret undas? Sic o lactea surge, Musa, surge; Surge inter medias serena sordes. Spumis qualiter in suis Dione, Cum prompsit latus aureum, atque primas Ortu purpureo movebat undas. Sic o lactea surge, Musa, surge: Enni stercus erit Maronis aurum.

TRANSLATION.