Difficili Parturitione Gemitus.[129]

O felix nimis illa, et nostrae nobile nomen Invidiae volucris, facili quae funere surgens Mater odora sui, nitidae nova fila juventae, Et festinatos peragit sibi fata per ignes. Illa, haud natales tot tardis mensibus horas Tam miseris tenuata moris, saltu velut uno In nova secla rapit sese, et caput omne decoras Explicat in frondes, roseoque repullulat ortu. Cinnameos simul illa rogos conscenderit, omnem Laeta bibit Phoebum, et jam jam victricibus alis Plaudit humum cineresque suos. Heu, dispare fato Nos ferimur; seniorque suo sub Apolline phoenix Petrensis mater, dubias librata per auras Pendet adhuc, quaeritque sinum in quo ponat inertes Exuvias, spoliisque suae reparata senectae Ore pari surgat, similique per omnia vultu. At nunc heu nixu secli melioris in ipso Deliquium patitur! At nunc heu lentae longo in molimine vitae Interea moritur! Dubio stant moenia vultu Parte sui pulchra, et fratres in foedera muros Invitant frustra, nec respondentia saxis Saxa suis; moerent opera intermissa, manusque Implorant. Succurre piae, succurre parenti, O quisquis pius es. Illi succurre parenti, Quam sibi tot sanctae matres habuere parentem. Quisquis es, o tibi, crede, tibi tot hiantia ruptis Moenibus ora loqui. Matrem tibi, crede verendam Muros tam longo laceros senioque situque Ceu canos monstrare suos. Succurre roganti. Per tibi plena olim, per jam sibi sicca precatur Ubera, ne desis senio. Sic longa juventus Te foveat, querulae nunquam cessura senectae.

TRANSLATION.