Der Ameisenkalender ist da!

Der Ameisenkalender ist da!

Wemmer zu Johanne jetzd, — Selwer schon forher, uff Ehre! — Sich in eene Gneibe setzt, Gomm' nadirlich Golbordehre.

Un was reichense der dar, De beredten Bildungsschbender? Eegal schon uffs nächste Jahr So ä Schdicker zwelf Galender!

Nee, weeß Gnebbchen, 's is zu blau! Wie ich mer ämal een globbe Meende nachens meine Frau: „Biste denn verrickd in Gobbe?

Draußen hastes Gorn noch schdehn . . . Un das genndste selwer wissen, Wemmer uff Mardini gehn, Hamm'n de Ginder halb zerrissen."

Beinah worde Mahle schlecht, Lose Reden gab's de Fille. Awwer haddese nich Rechd? Darum schwieg ich liewer schdille.

So was gab's doch friher nich, Un mer warden bis Weihnachden, Bis de Schnee lag, sicherlich, Ehr mer een mid heeme brachten.

Gehds so fort, denn werd's noch so, Daß an erschten Januare Eener gommd un sagd: „Ach wo?! Hier is der fon nächsten Jahre!"

Na, ich denke, mid der Zeid Werd ooch das sich wieder legen; Wer am mehrschden drahscht und schreid, Wärd zuerschd ooch lahm dergegen.

Wir fon alden Schrod un Gorn, Lassen uns nich erre machen; Ernstes wie fon jeher forn Un hernachens was zu lachen!

Nich zu dief un nich zu hoch Hat der „Griene" schdehds geschrieben, Un drum, denk ich, werd ihm ooch Unverbrichlich drei geblieben.

Mahle hat das ooch erfaßt Un so schbrichd se denn zuweilen: „Andohn, halde was de hast! Laß der nich den Gobb vergeilen!"

Wie ä frischen Blumenschdrauß Mer begrießd mid froher Miene, Gommd gee andrer mer ins Haus Als der alde gude „Griene“.

R.L.