So forth I went walkynge my iournay

So forth I went walkynge my iournay Metynge a lady olde and amyable Syttynge in a castell both fressh and gay On an olyphauntes backe in strength so stable Whiche it to bere was good and able Hauynge in her hande a cup of golde Sette with perles ryght many afolde

She sayd she was the lady of rychesse The quene of welth and worldely glory Praynge me to company with her noblenesse And she than wolde promote me shortely To innumerable ryches and make me worthy Where I am poore and sette by nought By her to worshyp I sholde be brought

Vnto her I answered I wolde not so As for to hunt in the parke of pryde The whiche to Clennes is mortall fo But with Dyscrecyon I wyll abyde Whiche doth a wyfe for me prouyde By whome I shall haue the possessyowne Of heuenly kyngdome & grete renowne

So forth I went and had grete trauayle Without the comfort of ony persone Saue of dyscrecyon whiche dyd me counsayle As she went walkynge with me alone Vnto her I made full grete mone And lykened the wyldernes by morall scence Vnto worldely trouble by good experyence

She sayd the fyrst lady that I dyd mete Iclyped was dame Sensualyte Whiche can well flater with wordes swete Causynge a man to fall into fragylyte And for to haunt the carnall freylte Whiche vnto clennes is abhomynable For they in werke be gretely varyable

The seconde was pryde enduyd with couetyse A lady of ryght fruytles medytacyon Delytynge gretly in the synne of auaryce The whiche is cause of her dampnacyon For she by her fals supportacyon Blyndeth many a mannes conscyence And dryueth ryght oft fer in absence

So ferther I went tyll at the last I was in a mase goynge in and oute Ther was none other way I was agast But forth I walked in grete doute Now here now there and so rounde aboute Than sayd vnto me dame Dyscrecyon Ye are in the besynes of worldely fastyon

Therein I trauayled by longe space Tyll that I mette a lady gloryous Indued with vertue and grete grace To whom I sayd o lady precyous As ye seme to be good and vertuous I you beseche now without delaye Vnto dame Clennes to teche me the waye

I Sapyence now wyll shewe to the The ryght waye vnto fayre clennes And yf thou wylt be ruled by me Thou shalt mary that noble prynces Yes that wyll I sayd than douteles Dyscrecyon sayd she wolde be my suerte Sapyence sayd none better myght be

Than sayd dyscrecyon to dame sapyence Welcome to vs my syster dere And I to her dyd humble reuerence Saynge who had went to fynde you here Yes she sayd I haue ben neere You often tymes syth my departynge And haue ben cause of your goode gydynge