Belle qui tiens ma vie

Belle qui tiens ma vie Captive dans tes yeulx, Qui m’as l’ame ravie D’un soubz-ris gracieux, Viens tost me secourir Ou me fauldra mourir.

Pourquoy fuis tu mignarde Si je suis pres de toy, Quand tes yeulx je regarde Je me perds dedans moy Car tes perfections Changent mes actions.

Tes beautéz & ta grace Et tes divins propos, Ont eschauffé la glace Qui me geloit les os, Et ont remply mon cœur D’une amoureuse ardeur.

Mon ame souloit estre Libre de passions, Mais amour s’est faict maistre De mes affections, Et a mis soubs sa loy Et mon cœur & ma foy.

Approche donc ma belle Approche toy mon bien, Ne me sois plus rebelle Puis que mon cœur est tien, Pour mon mal appaiser, Donne moy un baiser.

Je meurs mon Angelette Je meurs en te baisant, Ta bouche tant doucette Va mon bien ravissant À ce coup mes espritz Sont tous d’amour espris.

Plustost on verra l’Onde Contre mont reculer Et plustost l’œil du monde Cessera de brusler, Que l’amour qui m’époinct Decroisse d’un seul poinct.