Komen ist der winter kalt· wafena der leide

Komen ist der winter kalt wafena der leide der vns twinget blv̊men vnd kle lǒbes hat er vil gevalt ich was vf der heide da siht man den rif vnd ǒch den sne we mir we· wes fröwe ich mich dc ich aber singe het ich sinne so swige ich wan dc mich gedinge fröwet son gesvnge ich niemer me Hvndert wundert wa si si in dem mv̊te ist mir dú gůte steteklichen bi

Wer gesach ie schoner wib alder bas geschaffen dan als ich si zeinem male sah ir vil minneklicher lip hv̊b gen mir sin klafen hörent wie div tvgenderiche sprach ach vnd ach· wie tvmb ir sint went irs iemer triben úwer dienst niht fröide git hohgemv̊ten wiben gant ir tůt vns michel vngemach Hundert wundert wa si si in dem mv̊te ist mir dú gůte steteklichen bi

Do dú rede ergieng alsus mir begvnde leiden wan mir wc ir hulde gar verseit ich sprach solt ich ane kvs hinnan von ú scheiden si sprach los er weis wes ars er treit mir ist leit dc iemer man sol dar an gedenken alder der niht fůge kan ia lies ich in henken nv ê dc er růrte an min kleit Hundert wundert wa si si in dem mv̊te ist mir dú gůte steteklichen bi