Hie bevor do man so rehte minnekliche warb

Hie bevor do man so rehte minnekliche warb do waren mine sprúche ǒch fröidenriche sit dc dú minneklich minne also verdarb sit sanc ǒch ich ein teil vnminnekliche iemer als es danne stat also sol mans danne singen swenne vnfůge nv zergat so singe aber von húbschen dingen noch kvmt fröide vnd sanges tac wol im ders erbeiten mac der mirs gelǒben wolde so erkande ich wol die fůge wenne vnd wie man singen solde

Ich sage iv wc vns den meisten schaden tůt dú wib gelichent vns ein teil zesere dc wir in als lieb sin úbel alse gůt seht dc gelichen nimt vns fröide vnd ere scheiden vns dú wib als ê dc si sich ǒch liêssen scheiden dc gefrumt vns michels me manen vnd wiben beiden wc stet úbel wc stet wol sit man vns niht scheiden sol edelú wib gedenkent dc si ǒch eteswas kvnnen gelichet sin úch ir sit gedenket

Wib mv̊s iemer sin der wibe hohste name vnd túret bc danne frowen als ihs erkenne swa der deheinú si div sich ir wibheit schame dú merke disen sanc vnd kiese ǒch denne vnder frowen sint vnwib vnder wiben sint si túre wibes name vnd wibes lib dú sint beidú vil gehúre swies vmb alle frowen var wib sint alle frowen gar zwiuel lob dc hönet als vnderwilet frowen wib ist ein name ders alles krönet

Zwo fůge han ich doch swie vngefüge ich si der han ich mich von kinde her vereinet ich bin den fron bescheidenlicher fröide bi vnd lache vngerne swa man bi mir weinet durh die lúte bin ich fro dvrh die lúte wil ich sorgen ist mir anders danne also was dar vmbe ich wil doch borgen swie si sint so wil ich sin dc si niht verdriesse min manigem ist vnmere swc einen anderen were· der si ǒch bi den lúten swere

Ich sanc hie vor den frowen vmb ir blôssen grůs den nam ich wider mime lobe zelone swa ich des geltes nv vergebene warten mv̊s da lobe ein ander den si grüsse schone swa ich niht verdienen kan einen grůs mit mime sange dar kere ich vil herscher man minen nak alder ein min wange dc sprichet mir ist vmbe dich rehte als dir ist vmbe mich ich wil min lob keren an wib dv́ kvnnen danken wc han ich von dien vber heren