Ich han ir so wol gesprochen

Ich han ir so wol gesprochen dc si meniger in der werlte lopt hat si dc an mir gerochen owe danne so han ich getobt dc ich die getúret han vnd mit lobe gekrönet dv́ mich wider hönet frǒ minne· dc si iv getan

Frowe minne ich klage iv mere rihtet mir vnd rihtet vber mich der ie streit vmb úwer ere wider vnstete lúte dc wc ich in den dingen bin ich wunt ir habet mich geschossen vnd si gat genossen ir ist sanfte vnd ich aber vngesvnt

Frowe ir svlt mich lan geniessen dc ich weis ir habt strale me mvget irs an dc herze schiessen dc ir werde mir geliche we mvget ir edelú kv́nigin úwer wunden teilen oder die mine heilen sol ich eine alsus verdorben sin