Mich nimet iemer wnder was ein wip

Mich nimet iemer wnder was ein wip an mir habe ersehen das ir zǒber leit an minen lip was ist ir geschehen si hat ǒch ǒgen wie kvmet das als v́bel gesiht ich bin aller manne schönest niht das ist ane lǒgen

Habe ir ieman iht von mir gelogen so beschǒwe mich bas si ist an mir schone gar betrogen si wil anders niht wan wie stat mir min hǒbet das enist nit ze wol getan si betrúget lihte ein tvmber wan ob sis nit gelǒbet

Da si wônt da wonent wol tvsent man die vil schöner sint wan das ich ein lúzel zv̊ge kan so ist min schöne gar ein wint fv̊ge han ich kleine doch ist si gemeine so das si vil luten sol iemer sin gemeine

Wil si fůge fúr die schöni nemen so ist si vil wol gemv̊t kan si das so mv̊s ir wol gezemen swas si mir getv̊t so wil ich mich neigen vnd alles das si wil was bedarf si denne zǒbers vil ich bin doch ir eigen

Lat v́ch sagen· wie es vmbe ir zǒber stat des si wnder treit si ist ein wip dv́ schöne vnd ere hat da bi liep vnd leit das si iht anders kvnne das sol man gar verheln wan das ir wnnekliches leben machet sorge vnd wnne das ist ir leben