Under der linden

Vnder der linden an der heide da vnser zweier bette was da mugent ir vinden schone beide gebrochen blumen vnd gras vor dem walte in einem tal tandaradai schone sanc du nahtegal.

Ich kan gegangen zv der owe do was min friedel komen da wart ich enpfangen her frowe dc ich bin selig iemer me. er kuste mich wol tusent stunt. tandaradei seh wie rot mir ist der munt.

Do hat er gemachet also riche von blumen ein bette stat des wirt noch gelachet innekliche kvmt iemen an dc selbe pfat bi den rosen er wol mac tandaradei merken wa mirs hobet lac.

Das er bi mir lege wesses iemen vn welle got so schamt ich mich wes er mit mir pflege niemer niemen bevinde dc wan er vnd ich vnd ein kleines vogellin tandaradei dc mac wol getruwe sin.