Ad illustrissimum Virum; Dominum Comitem de Roscomon; In Tentamen suum sive Specimen de Poetis transferendis

Carmen Encomiasticon.

ANglia si claris pollet fæcunda Poetis Mundo præreptos jactans in pace triumphos; Pallada nutrivit si non minus ubere glebâ, Augusto quam magna tulit sub Cæsare Roma; Hoc Tibi debetur Comes illustrissime secli: Nam postquam per te patuit, populoque refulsit Ars Flacci, vatum surrexit vivida proles Divinis instructa modis & carmine puro. Jam non sola sequi vestigia sacra Maronis Sed transferre datur: Vos O gaudete superbi Angligenæ, meritisque virum redimite corollis Quem penes arbitrium est & jus & norma loquendi. Nam duce Te vatum series æterna sequetur, Qui tentare modos ausi immortalis Homeri, Heroasque, Deosque canent, plausuque secundo Non male ceratis tendent super æthera pennis. Et tua, docte Maro, (ni fallor) carmina reddent Majestate pari; dum læta vagaberis umbra Per sacrum spatiata nemus: Versuq; Britanno Æneadas mirata cani, bellumque, ducesque Et Pastoris Oves, his vocibus or a resolves. Quam bene Te poteram patulis amplectier ulnis Magne Comes, nostræ O famæ defensor & hæres! Nunc licet insulsi vertant mea scripta Poetæ, Mollior ac Elegis Ovidî sonet Ilias, ausit Mævius infælix calamo disperdere Versus, Cuncta piat Silenus, & haud imitabile carmen Prima quod infantis cecinit cunabula mundi Durabit, famamque per omne tuebitur ævum. Grandibus ille modis & mirâ pingitur arte: Per Te, Dulce decus, nostri viget ille laboris Relliquiæ, multum Britico celebrandus in ore. Tu Genio da fræna tuo, nec voce beatam Hâc tristere animam—cape dona extrema Tuorum. Carmina adhuc cineri exequias persolve Maronis, Pulchrior in tanta splendet mea gloria musâ. Plurimus Angligenum manibus versabere, plebi Sordebunt excusa ducum simulacra tabellis; Te melius vivo pingentem carmine cernent. Dum translatorum sudant ignobile vulgus, Ut captent oculos Phaleris, & imagine falsâ Lactent lectorem, & vanâ dulcedine pascant; Me mihi restituis versu, sensusque latentes Eruis, & duplicem reddit tua charta Maronem.