The Maccabees

kal. a[u]gustvs. passio sanctorvm machabeorum.

Æfter Ðam Ðe Alexander se egefulla cyning to-dælde his rice his dyrlingum ge-hƿilcum on his forð-siðe · ⁊ hi fengon to rice gehƿylc on his healfe · þa ƿeoxon fela yfelu ƿide geond eorðan for ðæra cyninga geƿinne

An ðæra cyninga ƿæs heora eallra for-cuðost arleas ⁊ upp-ahafen antiochus gehaten se feaht on ægypta | lande ⁊ afligde ðone cyning ⁊ ferde syððan to hierusalem mid mycelre fyrde ⁊ be-reafode godes templ goldes ⁊ seolfres ⁊ fela gold-hordas forð mid him gelæhte ⁊ ða halgan maðm-fatu ⁊ þæt mære ƿeofod ⁊ ofsloh þæs folces fela on ðære byrig ⁊ modelice spræc on his mihta truƿigende

Eft æfter sumū fyrste asende se cyning on ærend-geƿritum · þæt ealle menn gebugon to his hæðen-scipe ⁊ to his gesetnyssū ⁊ asende to hierusalē iudeiscre byrig on þære ƿæs ða geƿurðod se eall-ƿealdende god æfter ðære ealdan · ǽ · þe hi ana þa heoldon ⁊ het hi gebugan frā gode ⁊ frā his biggengum ⁊ arærde þæt deofol-gild uppon [drihtnes] ƿeofode ⁊ het hi ealle offrian to ðære anlicnysse ⁊ ælcne acƿellan þe ƿið-cƿæde his hæsum

Ƿearð þa mycel angsumnyss on eallū þam folce þe on god gelyfdon for ðam gramlicū dædum ⁊ manega gebugon to ðam manfullan hæðengilde ⁊ eac fela ƿið-cƿædon þæs cyninges hæsum ⁊ ƿoldon heora lif forlætan ærþan ðe heora ge-leafan ⁊ noldon hi fýlan mid þam fulan hæðenscype ne godes ǽ to-brecan þe hi on bocum ræddon

Hƿæt þa ƿearð gelæht sum geleafful bocere har-ƿencge ⁊ eald · se hatte eleazarus ⁊ hi betsungon him on muþ mid mycelre ðreatunge þone fulan mete þe moyses forbead godes folce to þicgenne · for þære gastlican getacnunge

Ƿe moton nu secgan sƿutellicor be ðysum hƿylce mettas ƿæron mannū forbodene on ðære ealdan · ǽ · þe mann ett nu sƿa-ðeah

Moyses for-bead for mycelre getacnunge on ðære eal|dan · ǽ · æfter godes dihte þa nytenu to etanne þā ealdan folce þe heora [cudu] ne ceoƿað ⁊ het ða unclæne ⁊ þa þe synd gehofode on horses gelicnysse unto-clofenū claƿum · ƿæron unclæne eac þa clænan nytenu þe heora cudu ceoƿað getacniað þa men þe on heora mode smeagað embe godes ƿillan · syððan hi his ƿord gehyrað of lareoƿa muðū sƿylce hi heora mete ceóƿan

And [sic @ Skeat] ða synd unclæne þe heora cudu ne ceoƿað for-ðan þe hi getacniað þa ðe tela nellað ne nellað leornian hƿæt gode leof sy ne on heora mode ƿealcan þæs hælendes beboda ⁊ syndon for-ðy unclæne sƿa sƿa ða forcuðan nytenu

Þa nytenu synd clæne þe to-cleofað heora claƿa ⁊ heora cudu ceoƿað · hi getacniað þa geleaffullan on godes gelaðunge · þe mid geleafan underfoð þa ealdan gecyðnysse ⁊ cristes gesetnysse þæt is seo ealde · ǽ · ⁊ seo niƿe gecyðnyss ⁊ ceoƿað godes beboda symle mid smeagunge

Þa nytenu ƿæron unclæne gecƿedene on þære · ǽ þe ne to-cleofað heora claƿa þeah ðe hi cudu ceoƿan oððe gif hi to-cleofað ⁊ ceoƿan nellað for ðære getacnunge þe ða toƿerd ƿæs þæt ƿe to-cléofan ure claƿa on þam tƿam gecyðnyssum on ðære ealdan · ⁊ on ðære niƿan þæt is · ǽ · ⁊ godspel ⁊ þæt ƿe on mode smeagan þæs ælmihtigan hæse ⁊ se ðe aþor forlæt · se leofað unclæne

Sƿa sƿa ða iudeiscan þe urne drihten forseoð ⁊ his godspel bodunge to bysmre habbað syndon unclæne · ⁊ criste andsæte þeah ðe hi moyses · ǽ · on heora muðe ƿealcon ⁊ nellað under-standan butan þæt steaflice ⁊git

Fela ƿæron forbodene godes folce on ðære · ǽ | þe nu syndon clæne æfter cristes to-cyme siððan paulus cƿ̅ to þam cristenum ðus

Omnia munda mundis. þæt is on englisc

Ealle ðincg syndon clæne þā clænū mannū þam ungeleaffullan ⁊ unclænū nis nan þincg clæne

Hara ƿæs ða unclæne forðan ðe he [nis] clifer-fete ⁊ sƿín ƿæs ða unclæne forðan þe hit ne ceoƿ his cudu

Sume ƿæron þa fule þe nu synd eac fule ac hit biþ to langsū eall her to logigenne be ðam clænū nytenū · oððe be þam unclænum on ðære ealdan · ǽ · þe mann étt nu sƿa-ðeah

Þa ƿolde eleazarus ƿerlice sƿeltan ærðan þe he godes · ǽ · forgegan ƿolde ⁊ nolde forsƿelgan ðas spices snæd þe hi him on muð bestungon · forðan þe moyses for-bead sƿýn to etenne sƿa sƿa ƿe ær sædon

Þa bædon ða cƿelleras for heora eald cyððe þæt hi moston hī beran unforboden flæsc ⁊ dyde sƿilce he æte of ðam offrung-spice ⁊ sƿa mid ðære hiƿunge him sylfum geburge

Ða cƿ̅ eleazarus

Ic eom eald to hiƿigenne ⁊ ƿenað þa geongan þæt ic ƿille for-gægan godes gesetnysse for ðisum sceortan life ⁊ bið þonne min hiƿung him to forƿyrde ⁊ ic sylf beo and-sæte þurh sƿylce gebysnunge

Ðeah ðe ic beo ahred frā manna reðnysse ic ne mæg þam almihtigan ahƿar ætberstan on life oþþe on deaðe · ac ic læte bysne þam iungum cnihtum gif ic cenlice sƿelte arƿurðum deaðe for ðære halgan · ǽ

Þa ƿurdon ða cƿelleras þe him cuðlice to-spræcon sƿyðe geyrsode for ðære andsƿare ⁊ tugon hine to þam ƿitum þæt he ƿurde acƿeald ⁊ he ða mid geleafan his líf ge-endode

Þær ƿurdon eac gelæhte · ⁊ | gelædde to ðam cynincge seofon gebroðra sƿyðe ge-lyfede ⁊ heora modor samod · ⁊ hi man mid sƿingle ðreade þæt hi etan sceoldon ongean godes · ǽ · spicc

Þa cƿ̅ se yldesta · hƿæt axast ðu æt us ƿe synd gearƿe to sƿeltenne sƿyðor þonne to forgægenne ures scyppendes · ǽ · þe he gesette þurh [moysen.] þa yrsode se cynincg · ⁊ het for-ceorfan his tungan ⁊ hine behættian ⁊ his handa forceorfan ⁊ eac befotian · ⁊ het feccan ænne hƿer ⁊ hine þær-on seoðan · oð þæt he saƿlode ætforan his gebroþrum þæt hi abúgan sceoldon

Hƿæt þa six gebroþra hi sylfe þa tihton ⁊ seo modor samod secgende him betƿynan þæt hi sƿeltan ƿoldon · for godes gesetnyssum; [sic @ Skeat] god sylf gefrefrað us sƿa sƿa moyses gesƿutelode on ðære fiftan béc · þæt is þæt god ge-frefrað his ðeoƿan þa gebundon ða cƿelleras þone oþerne broðor ⁊ hine behættedon hetelice · ⁊ axodon hƿæðer he etan ƿolde arðan þe he behamelod ƿurde

He cƿ̅ þæt he nolde · ⁊ hé ðá gelice ƿitu sƿa sƿa his yldra broðor ardlice under-feng ⁊ cƿ̅ to ðam cyninge þe hi acƿellan het

Ðu forscyldegodesta cynincg · ofslihst us ⁊ amyrst ac se ælmihtiga cyning us eft arærð to þam ecan life · nu ƿe for his · ǽ · sƿeltað

Hi bundon ðone þryddan ⁊ mid bysmore [heton] his tungan forð-ræcan · ⁊ he hraðe sƿa dyde ⁊ his handa him ræhte ⁊ mid anrædnysse cƿæð

Ðas lima ic hæfde þurh ðone heofonlican cynincg ac ic hi nu forseo for his gesetnysse forþan þe ic hopie to him · þæt ic hi eft under-fó æt him

And [sic @ Skeat] se cynincg ƿundrode ⁊ þa þe mid hī ƿæron ðæs cnihtes anrædnysse þæt he ða cƿylmincge | forseah

Æfter ðyses forð-siðe · hi ge-fengon ðone feorðan ⁊ eall-sƿa getintregedon · ac he anrædlice cƿ̅.

Selre us is to sƿeltenne ⁊ soðlice anbidian þæs ecan æristes · æt ðam ælmihtigan gode ac ðe ne bið nan ærist to ðam ecan life

Se ða ge-endode mid anrædum geleafan ⁊ hi gefengon to dreccenne þone fiftan broðor

He beseah ða to ðam cynincge · ⁊ cƿ̅. him þus to

Nu ðu mihte hæfst betƿux mannū sume hƿile þu dest sƿa sƿa ðu ƿylt · ac ne ƿen ðu sƿaðeah þæt se god us forlæte þe ƿe on gelyfað þu afindst his mihte ungefyrn on ðe sylfum hu he þe tintregað teartlice on ƿitum

Se geendode ða · ⁊ hi ardlice gelæhton þone sixtan broðor · ⁊ he sƿeltende · cƿ̅.

Ne dƿela ðu on idel · þeah ðe drihten ðe geþafige þæt ƿe for urum synnū to sƿylcere ƿæfersyne synd ⁊ ne ƿen ðu na be þé þæt þu unge-ƿitnod beo nu ðu ƿinst ongean god · ⁊ se ge-ƿat þa sƿa sona

Þa ƿundrode heora modor þæt hi sƿa ƿel ongunnon ⁊ heo mid bliþum mode hyre bearn æfre tihte ælcne on-sundron ⁊ sæde heom eallum

Ne fegde ic eoƿre lima · ne ic eoƿ lif ne forgeaf ac middan-eardes scyppend eoƿ sealde gast · ⁊ lif ⁊ he eft eoƿ for-gifð þæt ece lif mid him sƿa sƿa ge nu syllað eoƿ sylfe for his · ǽ

Hƿæt ða antiochus se arleasa cynincg behet þam anū cnapan þe þær cucu ƿæs þa git mycele ƿoruld-æhta gif he ƿolde him abugan ⁊ bæd eac ða modor þæt heo hire bearn tihte þæt he huru ana abuge þeah þe his gebroðra noldon ⁊ seo modor behet hī þæt heo ƿolde hine læran

Þa abeah seo modor | to hire bearne ⁊ cƿ̅

Gemiltsa me min sunu ic ðe to men gebær beseoh nu to heofonū · ⁊ besceaƿa þas eorðan ⁊ ealle ða ge-sceafta þæt him on synd nu ⁊ under-stand be ðam hu se ælmihtiga god hi ealle gesceop butan antimbre of nahte ⁊ ne forhta ðu ana for ðysum feondlican cƿellere ac under-foh þone deað sƿa sƿa ðine gebroðra dydon þæt ic ðe eft under-fó on eadignysse mid heom

Þa clypode se iungling to ðam cƿellerū þus · ⁊ cƿ̅.

Hƿæs andbidige ge · ne beo ic na gehyrsum þæs cyninges hæsum ac godes bebodū þe he bebead þurh moysen ⁊ þu manfulla cyning þinre modignysse scealt soðlice on godes dome susle ðroƿian

Ic sylle min agen lif · ⁊ minne lichaman samod for godes gesetnyssū · sƿa sƿa mine six gebroðra ⁊ ic clypige to gode þæt he urū cynne gemiltsige ⁊ þæt he dó mid ƿitum þæt ðu ƿite þæt he is ana god þa ƿearð se cynincg ƿælhreoƿ þam cnihte ofer ealle þa oðre þa he ær acƿealde for ðære forseƿennysse · ⁊ sé gesæliga cniht on þam teartum ƿitū geƿát þa of life mid fullum geleafan · ⁊ seo geleaffulle modor ƿearð eac acƿeald æt-foran þam cyninge æfter hire seofon sunum gesæliglice for gode

Þyssera martyra gemynd is on hlaf-mæssan dæg sƿa ƿide sƿa godes þeoƿas godes þenunge gymað

Manega halgan ƿæron under moyses · ǽ ac ƿe nabbað heora gemynd mid nanū mæsse-dæge butan þyssera gebroðra þe sƿa bealdlice ðroƿodon

Item. [§II.]

Ƿe ƿyllað eac aƿritan hu þæt geƿinn ge-endode ⁊ hu se ælmihtiga god þa arleasan afligde mid my|celre sceame · sƿa sƿa us sægð seo racu

Mathathias ƿæs gehaten sum heah godes þægn se hæfde fif suna ful cene mid him an hatte iohannes · oðer symon ðridda Iudas · feorða eleazárus fifta ionathas · binnan hierusalem; [sic @ Skeat] þas bemændan sarlice mid sƿyðlicre heofunge þæt hi sƿylce yrmðe gesaƿon on heora life ⁊ noldon abúgan to ðam bysmorfullan hæðen-scipe

Þa asende se cynincg to ðam fore-sædan ðegene ⁊ het hi ealle búgan to his blindum godū ⁊ him lac offrian · ⁊ forlætan godes · ǽ ac mathathias nolde þam manfullan gehyran ne godes · ǽ · forgægan for his gramlican ðreate

Efne þa eode on heora eallra gesihðe án Iudeisc mann to þā deofol-gilde ⁊ ge-offrode his lac sƿa sƿa antiochus hét

Hƿæt ða mathathias on mode ƿearð ge-ang-sumod ⁊ ræsde to ðam ƿere þe ðær ƿolde offrian ⁊ ofsloh hine sona · ⁊ siððan þone oþerne þæs cynincges ðegn · þe hine ðær-to neadode ⁊ to-ƿearp þæt deofol-gild · ⁊ ƿearð him aƿege

Clypode þa hlude · ælc þe geleafan hæbbe ⁊ godes · ǽ · recce · gange him to me

He fleah ða to ƿestene · ⁊ fela manna mid him mid anrædū mode · ⁊ ða manfullan for-saƿon.

Þa asende se cynincg him sona æfter mycele meniu to ðā ƿid-gillum muntum þær hi floc-mælū ferdon mid heora hiƿum

Þa ƿearð þær ofslagen sū dæl þæs folces þe on fyrlene ƿæs fram mathathian forðan þe hi noldon [feohtan] on þā freols-dæge ac leton hi ofslean on unscæððignysse þæt ƿerod ƿeox ða sƿyðe þe ƿæs mid mathathian ⁊ hi anrædlice fuhton · ⁊ afligdon ða hæðenan | mid mycelre strængðe · þe modegodon ongean god

Mathathias þa ferde mid his maga fultume ⁊ ehte þæra hæþenra · ⁊ mid ealle adræfde ⁊ godes · ǽ · arærde · ⁊ him eac god fylste

He ealdode þa · ⁊ his ende genealæhte ⁊ lærde his suna mid geleafan ⁊ cƿæð

Onginnað nu þegenlice · nu eoƿ þearf mycel is ⁊ syllað eoƿer agen líf for ðære soðfæstan · ǽ ⁊ for ura fædera cyðnysse · hit cymð eoƿ to ƿuldre

Beoð gemyndige nu mine bearn hu se mæra abraham on mycelre costnunge gode ƿæs getryƿe · ⁊ him com þæt to riht-ƿysnysse

Eall-sƿa ioseph · ⁊ hiesus naue dauid · ⁊ danihel · ⁊ ealle ða þe on god truƿodon ƿurdon æfre getrymde · for heora tryƿðe ƿið hine

Beoð nu gehyrte · ⁊ gehihtað on god ⁊ healdað mid ðegen-scipe ða halgan godes · ǽ forðan þe ge beoð ƿuldor-fulle on hire

Ne forhtige ge ic bidde for ðæs fyrn-fullan þreatum forðan þe his ƿuldor is ƿyrms · ⁊ meox nu todæg he modegað · ⁊ to-mergen he ne bið he aƿent to eorðan · ⁊ his geðoht forƿyrð

Eoƿer broðor symon is snotor · ⁊ rædfæst he bið eoƿ for fæder folgiað his rædum

Iudas machabeus is mihtig · ⁊ strang beo he eoƿer ealdor on ælcum gefeohte ⁊ gaderiað eoƿ to þa þe godes · ǽ · lufiað ⁊ ƿrecað eoƿer folc · on ðam fulum hæðenū ⁊ healdað godes · ǽ · on godum biggencgum

He bletsode ða his suna · ⁊ sƿa ge-ƿát of life ⁊ his lic ƿæs bebyriged on his agenre byrig ⁊ israhel hine beƿeop on þa ealdan ƿisan

[III.]

Hƿæt ða iudas machabeus mihtiglice arás on his fæder stede · ⁊ ƿiðstod his feondum ⁊ his feoƿer gebroðra him | fylston anrædlice ⁊ ealle ða þe ƿæron ƿunigende mid his fæder ⁊ fuhton ða mid blisse · ⁊ afligdon þa hæþenan

Iudas ða hine gescrydde mid his scinendan byrnan sƿa sƿa ormæte ent · ⁊ hine ealne geƿæpnode ⁊ his fyrde beƿerode ƿið fynd mid his sƿurde

He ƿearð þa leon gelic on his geƿinnum · ⁊ dædum ⁊ todræfde þa arleasan · ⁊ his eðel gerymde

His fynd þa flugon afyrhte for him ⁊ ealle ða yfel-ƿyrcendan ƿurdon gedræfde ⁊ seo hæl ƿearð gesped on iudan handum ða ⁊ he geblissode his cynn þe ƿæs gecƿeden iacob ⁊ his hlisa þa asprang to þam ytemestan landū

Ða gegaderode appollonius sū gramlic heretoga of samarian byrig sƿyðlice fyrde ⁊ of manegum ðeodum menn to ge-feohte to-geanes israel ⁊ iudan mægðe ac iudas him com to · ⁊ acƿealde hine sona ⁊ fela his folces · ⁊ ða oðre ætflugon

Iudas ða gelæhte þæs appollonies sƿurd þæt ƿæs mærlic ƿæpn · ⁊ he ƿann mid þam on ælcū gefeohte on eallū his life

Eft ða ƿæs sum heretoga gehaten seron on syrian lande · se · cƿ̅ · to his leode

Ic ƿille ƿyrcan me naman ⁊ ofer-ƿinnan iudan ⁊ þa ðe him mid synd þe forsaƿon ðone cyning

He gesamnode þa his fyrde · ⁊ ferde mid prasse to iudea lande · ⁊ fela leoda mid him

Iudas þa him com to · ⁊ his geferan cƿædon

Hu mage ƿe þus feaƿa feohtan ongean ðas meniu nu ƿe synd geƿæhte mid geƿinne ⁊ mete-leaste

Iudas him andƿyrde anrædlice ⁊ cƿæð

Nis nan earfoðnyss ðam ælmihtigan gode on feaƿū mannum · oððe on micclum ƿerode to helpen|ne on ge-feohte · ⁊ healdan þa ðe he ƿile forðan þe se sige bið symle of heofonū

Ðas cumað to us sƿylce hi cenran syndon ⁊ ƿillað us fordon · ⁊ aƿestan ure land ƿe soðlice feohtað for us sylfe ƿið hi ⁊ for godes · ǽ · ⁊ god hi eac fordeð ætforan ure gesihðe · ne forhtige ge nates hƿón

Æfter ðyssere spræce hi eodon to-gædere ⁊ iudas ða afligde þone fore-sædan seron ⁊ his here samod mid sƿyðlicre bylde ⁊ þær ƿurdon ofslagene eahta hund ƿera ⁊ ða oðre ætflugon to philistea lande

Iudan ege ða asprang ƿide geond land ⁊ his gebroðra oga ofer ealle ða hæðenan ⁊ ealle þeoda spræcon hu ðegenlice hi fuhton

Iudea land ƿæs ða lange butan cyninge on eallum þysum geƿinnū · ac hí ƿerode iudas ⁊ eft his gebroðra æfter his geendunge

[IIII.]

Hƿæt ða ƿearð gecydd þam cyninge Antioche embe iudan sige · ⁊ he gesƿearc ða on mode ⁊ sende ða his here mid anum heah-þegne lísias gehaten on iudea lande on ðære fyrde ƿæron feoƿertig þusenda ⁊ seofon þusenda sƿyðe geƿæpnode ⁊ comon ða mid þrymme to iudeiscum cynne

Iudas þa gehyrte his geferan mid ƿordum ⁊ fæston ænne dæg fultumes biddende æt þam ælmihtigan gode · þæt he hi gemundian sceolde ⁊ his halige templ healdan ƿið þa hæðenan

Hi ferdon ða gehyrte to þam gefeohte ƿerd ⁊ iudas eft ða spræc to eallum his geferum beoð ymb-gyrde stranglice to þysum stiðan geƿinne forðan þe us is selre þæt ƿe [sƿelton] on gefeohte þonne þas yrmðe geseon on urū | cynne ðus ⁊ on urū halig-dome · ac sƿa sƿa se heofonlica god ƿylle dón be ús · geƿurðe hit sƿa

Beoð gemyndige hu mihtiglice he ahredde ure fæderas íu · ƿið pharaó þone kyning on ðære readan sǽ on þære ðe he besanc to grunde;

Uton clypian to heofonum þæt god ure helpe ⁊ to-brýte þisne here · þæt þa hæðenan to-cnaƿon þæt nis nan oðer god þe israhel alyse

Machabeus þa genealæhte mid lytlum ƿerode þæt ƿæron ðreo þusend þe him ða gelæstan ƿolde

Hi [bleoƿon] þa heora byman ⁊ bealdlice fuhton oð þæt þa hæðenan flugon · to fyrlenum landum ⁊ iudas hi to-ðræfde sƿa sƿa deor to ƿuda

Þær ƿurdon ofslagene sume þreo þusend ⁊ iudas þa funde þa ða he frā fyrde gecyrde gold · ⁊ seolfor · godeƿeb · ⁊ purpuran ⁊ fela oðre here-reaf on þam fyrd-ƿicum ⁊ hi þancodon ða gode eallre his godnysse

Eft on ðam oþrū geare geanlæhte lisias fif ⁊ sixtig þusenda fyrdendra þegena ⁊ ƿolde ofer-feohtan þæt iudeisce folc

Iudas ða machabeus micclū on god truƿode ⁊ ferde him togeanes mid þam folce þe he hæfde þæt ƿæron tƿelf þusend ƿigendra manna ⁊ iudas hine gebæd þa ⁊ bletsode his scyppend gebletsod eart ðu ælmihtig israhela hælend þu ðe to-bryttest iu þone breman here on dauides handum · to-brýt nu ðas hæðenan on þines folces handum · ⁊ mid fyrhte ge-egsa alege hi mid sƿurdum ðe lufigendra þæt ealle þe herian · þe gehyrað þinne naman

Hi slogon þa togædere unslaƿe mid ƿæpnum ⁊ þær feollon ða hæþenan fif ðusend ofslagene ⁊ lisias fleah mid þære fyrd-lafe

| Þa cƿ̅ iudas to his geferum þæt he ða fylðe ƿolde adón of þam godes temple · þe se gramlica antiochus þær aræran hét on hæðene ƿisan ⁊ hi ferdon ða to · ⁊ þa fylðe adydon ut of ðam godes huse · ⁊ godes lof arærdon æfter moyses · ǽ · mid mycelre blysse ⁊ offrodon gode lác mid geleafan ⁊ sange

[V.]

Iudas ða hine beƿende ⁊ ƿan ƿið ða hæðenan forðan ðe hi ƿoldon aƿestan þa iudeiscan ac iudas hi ofer-feaht ⁊ aflymde hi æfre ⁊ heora burga forbernde ⁊ hí to bysmore taƿode

Efne ða on sumū dæge · sende man to iudan ærend-geƿritu frā israhela ðeode ⁊ cyddon þæt þa hæþenan hæfdon hi besetene ⁊ ofslagen hæfdon sum þusend manna

Eac on oðre healfe him comon ærendracan to of galileiscum lande heora lifes orƿene ⁊ cyddon þæt ða hæðenan him comon to gehƿanon ⁊ ƿoldon hi fordón ⁊ adilegian heora eard

Iudas ða be-fran his geferan rædes ⁊ cƿ̅ to simone his ge-sceadƿisan breþer

Geceos ðe nu fultum · ⁊ far to galilea ⁊ gehelp ðinum magū ðe ða manfullan besittað ic ⁊ ionathas min gingra broðor farað to galááð to afligenne þa hæðenan

He gesette ða heafod-menn · to gehealdenne þæt folc ⁊ bead þæt hi ne ferdon to nanū gefeohte ongean ða hæðenan oð þæt he ham come

Simon ða genam þreo ðusend mid him ⁊ iudas ⁊ ionathas eahta þusenda ⁊ symon feaht gelome · ⁊ aflymde ða hæðenan ⁊ his magas ahredde ƿið heora reðnysse ⁊ to lande gebrohte mid mycelre blisse

Iudas éác ferde | ofer iordanen ða éá geond þæt ƿidgille ƿæsten · ⁊ geƿylde ða hæðenan

He com þa to anre byrig bosór gehaten on ðære ƿæron ða hæðenan þe hyndon his magas þa he ealle ofsloh mid sƿurdes ecge ⁊ ontende ða burh ⁊ tencgde hī forð syððan

Efne ðæs on mergen him com sƿa mycel mennisc to þæt nan mann ne mihte ða meniu geríman ⁊ begunnon to feohtenne fæstlice mid cræfte ⁊ nyston þæt machabeus mid þam mannum ƿæs

Þa ða iudas gehyrde þæra hæðenra gehlyd ⁊ þæs feohtes hream · þa ferde he him hindan to mid ðrym scyld-truman · ⁊ sloh ða hæðenan oð þæt hi oncneoƿon þæt se cena iudas him ƿið-feohtende ƿæs · ⁊ ƿendon ða to horsum ƿiston þæt hí ne mihton machabeo ƿið-standan

On þam gefeohte ƿurdon eahta ðusend ƿera ofslagene þæs hæðenan folces · ⁊ ða oþre æt-flugon

Iudas ða ferde feohtende ƿið þa hæðenan ⁊ heora burga forbærnde · ⁊ hi bysmorlice ofsloh þa com timotheus sum cene heretoga mid ormætre fyrde · ⁊ gesæt æt anum forda

Ac iudas him com to caflice mid ƿæpnū ⁊ ofer-ferdon ðone ford · ⁊ fuhton ƿið þa hæðenan sƿa sƿa his geƿuna ƿæs · oð þæt hi ƿendon him fram ⁊ heora ƿæpna aƿurpon · ⁊ geƿendon to anre byrig ac iudas hi for-bærnde ⁊ þa burh samod

He genam ða his magas of ðam manfullan mid ƿifum ⁊ mid cildrū · ⁊ geƿendon him ham þa ƿæs þær an mycel burh on heora ƿege middan ⁊ næs nanes mannes fær on naþre healfe þære byrig buton ðurh þæt port · ⁊ hi bædon | ða georne þæt hi mid friðe moston faran þurh ða burh þe hi forbugan ne mihton · ac ða burhƿare noldon þæs færes him getyðian · ac betyndon þa gatu mid micclum ƿeorc-stanū · ⁊ truƿodon to þam ƿealle

Þa ne mihte iudas mete-leas þær abidan ac het abrecan þone ƿeall þeah þe he brad ƿære

Eodon ða ealle inn · ⁊ ofslogon ealle ða hæðenan ⁊ [aƿeston] ða burh · ⁊ ƿendon him ham-ƿerd oþ þæt hi comon ansunde to lande ⁊ ge-offrodon heora lac þam lifigendan gode þancigende his gescyldnysse þæt hi ealle gesunde comon eft to heora earde · of sƿa micelre frecednysse

Ac heora geféran æt ham fuhton unƿærlice ƿið þa hæðenan leoda ofer iudan leafe þa hƿile ðe he ute ƿæs · ⁊ ƿurdon ða ofslagene ƿel fela manna · ða ða hi fuhton buton ƿis-dome

Seo æftre bóc us sægð þæt hí on sumne sæl fuhton þa ƿurdon hi sume besƿicene mid gitsunge sƿa þæt hi feoh naman · ⁊ fracodlice [behyddon] on heora bosmum of ðam deofollicum biggencgum ongean godes · ǽ · ⁊ hi ealle ðær feollon þe þæt feoh behyddon on ðam gefeohte ofslagene ⁊ heora geferan fundon þæt feoh on heora bosmum ⁊ cƿædon þæt god sylf ge-sƿutelode heor unriht ⁊ heredon godes dom þe heora digle geopenode

Iudas gegaderode ða godne dæl feos þæt ƿæron tƿelf þusend scyllinga eall hƿites seolfres ⁊ sende to hierusalem for heora synnum to offrigenne heora saƿle to alysednysse þe ðær ofslagene ƿæron æƿfæstlice under-standende be ure ealra æriste buton hé gélyfde þæt hi æfter langum fyrste of | deaðe arísan sceoldon þe ðær ofslagene ƿæron elles he offrode on idel his lác ac he soðlice besceaƿode · þæt ða ðe mid soðre arfæstnysse on deaþe ge-endiað · þæt hi mid drihtne habbað þa selestan gife on þam soðan life

Hit is halig geðoht · ⁊ halƿende to gebiddenne for ðam forð-farendū þæt hi fram synnum beon alysede

[VI.]

Hit sægð on þære æftran béc machabeorū þus þæt timotheus ðe ær fleah æt ðam forda fram iudan þæt he eft gegaderode oþerne here him to ⁊ ƿolde mid ƿæpnum geƿyldan þa iudeiscan ⁊ com ða mid fyrde to gefeohte gearu ⁊ machabeus se cena clypode to gode ⁊ his geferan eac sƿa fultumes biddende eodon þa of ðære byrig ge-bylde þurh god ⁊ hi fengon togadere fæstlice mid ƿæpnum

Hƿæt ða færlice comon fif englas of heofonum ridende on horsum mid gyldenum gerædum ⁊ tƿægen þæra engla on tƿa healfe iudan feohtende ƿæron · ⁊ hine eac beƿerodon ⁊ hi ealle fif fuhton mid iudan sceotiende heora flán ⁊ fyrene ligettas on ða hæðenan leoda · oð þæt hi licgende sƿulton tƿentig þusend manna ⁊ six hund ofslagene

Timotheus þa fleah mid fyrhte for-numen into anre byrig · ⁊ him æfter ferde iudas mid fultume · ⁊ fuhton ƿið-utan oð þæt hi ofer-ƿunnon ⁊ geƿyldon þa burh ⁊ timotheum acƿealdon þær ðær he becropen ƿæs ⁊ his broðor samod mid sƿurdes ecge

Æfter þysum dædū hi þancodon drihtne mid lofsangū ⁊ andetnyssum eallra þæra mærða þe he ðam iudeiscū gedyde for-oft ⁊ him sige forgeaf · ⁊ siðe|don ða hám

Gif hƿa nu ƿundrige hu hit geƿurþan mihte þæt englas sceoldon ridan on gerædedum horsum þonne ƿite he to soþan þæt us secgað gehƿǽr ða halgan godes béc þe ne magon beon lease þæt englas oft comon cuðlice to mannū sƿilce on horse ridende · sƿa sƿa ƿe hér rehton

Þa Iudeiscan ƿæron ða dyreste gode on ðære ealdan · ǽ · forðan þe hi ana ƿurðodon þone ælmihtigan god mid biggencgum symle oþ þæt crist godes sunu sylf ƿearð acenned of menniscū gecynde of þam Iudeiscū cynne of marian þam mædene butan menniscū fæder

Þa noldon hi sume gelyfan þæt he soð god ƿære ac syrƿdon embe his lif · sƿa sƿa he sylf geðafode;

Ƿæron sƿa-þeah manega of þam [man]cynne · gode ge on ðære ealdan · ǽ · ge eac on þære niƿan heah-fæderas · ⁊ ƿitegan · ⁊ halige apostolas ⁊ fela ðusenda þe folgiað criste þeah þe hi sume ƿunian ƿiðer-ƿerde oþ þis

Hi sceolon sƿa-ðeah ealle on ende gelyfan ac ðær losiað to fela on þam fyrste betƿux for heora heard-heortnysse ƿið þone heofonlican hælend

[VII.]

Betƿux þysum ferde se fore-sæda antiochus to persiscre þeode mid micclum þrymme ƿolde þær ofer-ƿinnan sume ƿelige burh ac he ƿearð þanon afliged ⁊ fracodlice ætbærst ⁊ mid micelre angsumnysse of þam earde geƿende to babilonian ƿerd · ⁊ hī ƿearð þa gecydd hu iudas ofer-feaht his fynd mid ƿæpnū ⁊ hu he geclænsod hæfde þæt halige godes templ frā eallum þam fylðum þe he fyrnlice þær arærde ƿearð þa geang|sumod ⁊ eac ge-untrumod forðam þe him god gram ƿæs · ⁊ he grimetode egeslice secgende ⁊ seðende þæt him sƿa gelumpen ƿæs forðan ðe he godes templ · taƿode to bysmore ⁊ ða geleaffullan ƿolde of heora lande adylegian

Him ƿeollon þa ƿurmas of ðam [geƿitnodan] lichaman ⁊ he stánc sƿa fúle þæt man hine ferian ne mihte ⁊ he ða yfele ⁊ earmlice ge-endode on ælfremedom (sic) earde to þam ecan ƿitum ⁊ his sunu eupator æfter him rixode

Se ƿearð eac ongebroht þæt he ofslean ƿolde þa geleaffullan iudei · þe gelyfdon ða on god

Hi gelyfdon þa on þa ealdan ƿisan · on þone ælmihtigan god þeah ðe hi sume ƿið-socon siðþan þone hælend ⁊ eac sƿa ofslogon sƿa sƿa he sylf ƿolde

Hƿæt ða eupatór antioches sunu gegaderode his fyrde fyrran ⁊ nean ⁊ sende hund-teontig þusenda gangendra manna ⁊ tƿentig þusenda gehorsedra manna ⁊ þrittig ylpas ealle getemode ⁊ to ƿige geƿenode mid ƿundorlicum cræfte

Fif hund gehorsedra manna ferdon mid ælcum ylpe ⁊ on ælcum ylpe ƿæs an ƿig-hus getimbrod ⁊ on ælcum ƿig-huse ƿæron þrittig manna feohtende [mid cræfte] · ⁊ mid ge-cneordnysse farende

Sumū menn ƿile þincan syllic þis to gehyrenne forþan þe ylpas ne comon næfre on engla lande

Ylp is ormæte nyten mare þonne sum hus eall mid banum befangen binnan þam felle butan æt ðam nauelan · ⁊ he næfre ne lið

Feoƿer ⁊ tƿentig monða gæð seo modor mid folan ⁊ þreo hund geara hi libbað gif hi alefede | ne beoð ⁊ hi man mæg ƿenian ƿundorlice to ge-feohte

Hƿæl is ealra fixa mæst · ⁊ ylp is eallra nytena mæst ac sƿa-þeah mannes gescead hi mæg geƿyldan

Þa hæðenan ða ferdon to ðam gefeohte sƿyðe ⁊ mid mór-beriū gebyldon þa ylpas forðan þe mór-berian him is metta leofost

Þær ƿæs sƿyðe egeslic here þæra hæðenra manna ac sƿa-ðeah iudas heom eode to mid ƿige ⁊ ofsloh þær sona six hund ƿera ⁊ an his geferena eleazarus hatte arn to anum ylpe þe ðær [ænlicost] [MS. enlicost] ƿæs ƿende þæt se cyning ƿære on ðam ƿig-huse ðe he bær he arn mid atogenū sƿurde betƿux þam eorode middan ⁊ sloh æfre on tƿa healfa þæt hi sƿeltende feollon oð þæt he to þam ylpe com · ⁊ eode him on under stang ða hine æt ðam nauelan þæt hi lagon ðær begen heora egðer oðres slaga · ⁊ iudas siððan ge-ƿende into hierusalem mid ealre his fyrde ⁊ ƿeredon hi cenlice ƿið þone onƿinnendan here oð þæt se cynincg feng to friðe ƿið hi be his ƿitena ræde · ac he hit hraðe tobræc

He cyrde ða ham-ƿerd mid his here-lafe ⁊ hine ofsloh sona sum sigefæst þegen demetrius gehaten · ⁊ hæfde his rice on antiochian byrig · ⁊ þær abutan gehƿær

[VIII.]

Hƿæt þa alchimus se arleasa sacerd ƿrehte mid leasungū his leode to þam cyninge ⁊ se cyning demetrius þam manfullan gelyfde ⁊ gesƿencte ða iudeiscan · oð þæt he sende him to nicánor his ealdor-man þæt he hi ealle fordyde

Nicánor þa ferde mid fyrde to hierusalem ⁊ sende to iudan mid sƿicdo|me ⁊ cƿ̅

Ne com ic for nanū gefeohte ac for freondscipe to eoƿ ⁊ cyste ða iudan · ⁊ his cempan ƿæron gearƿe to genimenne iudan on bendum

Iudas þa under-geat heora ƿælhreoƿan sƿicdom ⁊ ƿende him fram sona · ⁊ nolde hine geseon

Nicánor þa oncneoƿ þæt his facn cuð ƿæs began ða to feohtenne færlice ƿið iudan oð þæt þær feollon of his fyrde fif ðusend manna ⁊ þa oðre ætflugon afyrhte for iudan

Nicanor þa sceaƿode salomones templ ⁊ sƿor þurh his godas þæt he þæt godes hus ƿolde mid fyre forbærnan butan him man betæhte iudan gebundene to bismorlicū deaðe ƿende him sƿa aƿæg ƿodlice geyrsod

Hƿæt ða sacerdas ða mid sƿyðlicre heofunge bædon þone ælmihtigan god · þæt he his agen hus gescylde ƿið þone arleasan · ⁊ hine ardlice fordyde

Nicanor þa eft genam oðre fyrde of sirian ƿolde his gebeot mid ƿeorcum gefremman ⁊ iudas him com to · mid þrim ðusend cempum ⁊ gebæd hine to gode gebigedum limū þus

Drihten · þu þe asendest þinne scinende engel þa ða syrian kynincg sende þurh his heretogan on ærend-geƿritum þé tallice ƿord ⁊ se engel ofsloh þa on anre nihte of heom an hund þusend manna · ⁊ hund-eahtatig þusenda to-brýt nu sƿa ic bidde þisne breman here ætforan urum gesihðum · þæt men magon geseon þine mihte on heom

Hi fengon þa togædere fæstlice mid ƿæpnū ⁊ nicánor æt fruman feoll þær ofslagen ⁊ his here aƿearp heora ƿæpna ⁊ flugon ac iu|das him folgode fæstlice mid ƿæpnum ⁊ bicnode gehƿanon mid blaƿunge him fultum oð þæt hi man gynde ongean eft to iudan ⁊ hi ealle ofslogon þæt ðær an ne belaf

Namon þa heora ƿæpna ⁊ heora geƿæda mid heom ⁊ nicanóres heafod ⁊ his sƿyðran hand ⁊ setton þa to tacne for his teon-rædene ⁊ þancodon þa gode þearle mid ƿurðmynte

Ƿunodon ða on sibbe sume hƿile æfter ðam ⁊ iudas þa sende mid sibbe to rome gecorene ærendracan ƿolde [cuðlæcan] ƿið hi forðan þe romanisce ƿitan ƿæron ða mihtige ⁊ rædfæste on ƿeorcum · ⁊ ofer-ƿunnan heora fynd

[VIIII.]

Hit ƿearð gecydd syððan þam cynincge demetrio þæt nicanor feol ⁊ eall his folc mid hī þa ƿolde he git sendan ⁊ ofslean þa iudeiscan ⁊ funde ða bachidem se ƿæs mid bealuƿe afylled ⁊ alchimum mid him þone arleasan sacerd ⁊ sende hi mid ge-fylce to iudeiscū folce

Hi comon ða færlice mid gefeohte to iudan ⁊ his ge-feran eargodon butan eahta hund mannū þe him mid fuhton ƿið þone feondlican here

Þa cƿædon his geferan þæt hi fleon ƿoldon forðan þe heora ƿerod ƿæs geƿanod mid þam fleame ⁊ ƿoldon heom beorgan ƿið þone breman here

Þa ⁊ƿyrde iudas · sƿa sƿa he eall cene ƿæs

Ne ge-ƿurðe hit na on life · þæt ƿe alecgan ure ƿuldor mid earh-licum fleame · ac uton feohtan ƿið hí ⁊ gif god sƿa fore-sceaƿað · ƿe sƿeltað on mihte for urū gebroðrū butan bysmorlicum fleame

Hi comon þa to-gædere · ⁊ begunnon to feohtenne | on tƿam gefylcū forð eallne ðone dæg ⁊ iudas þa beseah to þære sƿyðran healfe þæt þa ƿæron strængran · ⁊ stop ðyder sona mid ðam anrædystum mannum þe him mid fuhton ⁊ todrifon þone ende · ac him æfter eode þæt oðer gefylce · mid gefeohte hindan ⁊ feollon ða on tƿa healfe on þam gefeohte manega ⁊ iudas eac feoll · ⁊ þa oðre ætflugon

Þa gelæhton his gebroðra his lic of ðam ƿæle ⁊ bebyrigdon on modín to mathathian his fæder ⁊ ealle folc hine beƿeop on ða ealdan ƿisan

Ne synd sƿa-þeah aƿritene þæs ðe ƿyrd-ƿriteras sæcgaþ ealle iudan gefeoht for his freonda ƿare ⁊ ealle ða mihte þe he mærlice gefremode his folce to gebeorge · sƿa sƿa us béc secgað

Menig-fealde ƿæron his micclan gefeoht ⁊ he is eall sƿa halig on ðære ealdan gecyðnysse sƿa sƿa godes gecorenan on ðære godspel-bodunge forðan þe he æfre ƿan for ƿillan þæs ælmihtigan

On þam dagum ƿæs alyfed to alecgenne his fynd ⁊ sƿiþost ða hæðenan þe him hetole ƿæron ⁊ se ƿæs godes ðegen þe ða sƿiðost feaht ƿið heora onƿinnendan to ƿare heora [leoda] ac crist on his tocyme us cydde oðre ðincg ⁊ het us healdan sibbe · ⁊ soðfæstnysse æfre ⁊ ƿe sceolon ƿinnan ƿið þa ƿælhreoƿan fynd þæt synd ða ungeseƿenlican · ⁊ þa sƿicolan deofla þe ƿillað ofslean ure saƿla mid leahtrum ƿið ða ƿe sceolon ƿinnan mid gastlicū ƿæpnum ⁊ biddan us gescyldnysse simle æt criste þæt ƿe moton ofer-ƿinnan þa ƿælhreoƿan leahtras ⁊ þæs | deofles tihtinge · þæt he us derian ne mæge

Þonne beoð ƿe godes cempan on ðam gastlican gefeohte gif ƿe ðone deofol forseoþ þurh soðne geleafan ⁊ þa heafod-leahtras þurh gehealtsumnysse ⁊ gif ƿe godes ƿillan mid ƿeorcum gefremmað

 ealde godes folc sceolde feohtan þa mid ƿæpnum ⁊ heora geƿinn hæfde haligra manna getacnunge þe to-dræfað þa leahtras ⁊ deofla heom fram on ðære niƿan gecyðnysse þe crist sylf astealde

Secgað sƿa-þeah lareoƿas þæt syndon feoƿer cynna gefeoht iustum · þæt is rihtlic · iniustum · unrihtlic ciuile · betƿux ceaster-geƿarū · Plusquā ciuile · betƿux siblingum

Iustum bellum · is rihtlic gefeoht ƿið ða reðan flot-menn oþþe ƿið oðre þeoda þe eard ƿillað fordón

Unrihtlic gefeoht is þe of yrre cymð

 þridde gefeoht þe of geflite cymð betƿux ceaster-geƿarum is sƿyðe pleolic ⁊ þæt feorðe gefeoht þe betƿux freondum bið is sƿiðe earmlic ⁊ endeleas sorh

[X.]

Israhela folc þa anmodlice geceas ionatham his broþor biddende þæt he ƿære heora heafod · ⁊ here-toga ƿið þa hæþenan þeoda ⁊ he feng ða to ealdor-dome · sƿa sƿa hi ealle bædon ⁊ ƿerode hi manega gear ƿið þone onƿinnendan here ⁊ ƿiþ bachidem feaht þe his broþor ofsloh ⁊ þǽr síge gefór · ⁊ ofslóh þær an þusend;

Þa ƿolde alchimus se arleasa sacerd to-brecan godes templ mid teonfullū graman ac hine sloh god sona mid sƿyðlicum paralisyn sƿa þæt he dumb ƿæs · ⁊ to deaðe | gebroht ⁊ mid mycclum tintregum his teonfullan gast of ðam lichaman forlét to langsumum ƿitum

Ionathas ƿunode on ƿurðmynte ða lange ⁊ cynegas hine ƿurðodon mid ƿordum ⁊ gifum ⁊ he sige geferde on manegum gefeohtum ⁊ æfre ƿæs ƿinnende embe godes ƿillan ⁊ eac his lif forlét for his leode ƿare

Symon þa syððan snoterlice geheold þone iudeiscan eard æft̅ ionathan his breðer ⁊ on eallum his dagū ne derode him nan man ac ƿunodon æfre on sibbe on symones dæge oð þæt he on ende eac ƿearð ofslagen sƿa sƿa his gebroðra for soðfæstum biggencgum ⁊ for heora leoda ƿare · ac hi lybbað on ecnysse mid þam heah-fæderum for heora hylde ƿið god

Iohannes ƿæs geciged þæs symones sunu se ƿæs æfter his fæder ðæs folces heretoga ⁊ hi hlysfullice geheold ƿið þa hæðenan ðeoda on eallū his life · ⁊ þæt land beƿerode

[XI.]

Ƿe habbað forlætan for þysre langsuman race an ƿundorlic ðincg · þe ƿe ƿillaþ secgan nu

On ðam dagum þe hierusalem ⁊ eall iudea-land ƿunode on sibbe · þa ƿæs þær sum sacerd onias gehaten haliges lifes mann ⁊ seleucus cynincg sende fela laca on golde · ⁊ on seolfre · to þā godes temple of asian lande þæs easternan rices ⁊ ƿide of middan-earde man ƿurðode þæt templ ⁊ onías se arƿurða ƿolde mid ðam lacum ƿideƿan ⁊ steop-bearn beƿerian ƿið hunger

Þa ferde sum leogore ⁊ belæƿde þæt feoh sæde þam ealdor-menn appollonius | geciged þæt þæt feoh mihte becuman ðam cyninge to handa ⁊ se ealdor-mann sona hit sæde þā cyninge

Hƿæt ða se cynincg sende sona ænne þegen heliodorus gehaten to ðam halgan temple þæt he feccan sceolde þæt feoh mid reaf-lace

He com þa mid ƿerode · ⁊ ƿolde þæt feoh habban ⁊ se sacerd onías · sæde þæt hit ƿære ƿideƿena big-leofa · ⁊ ƿanhafolra manna of godra manna ælmyssan ðam ælmihtigan to lofe ⁊ þa sacerdas feollon ætforan þam ƿeofode biddende þone ælmihtigan god þæt he gehulpe his ðeoƿum

Heliodorus ða gemynte þa maðmas to genimenne ac þær ƿearð geseƿen sƿutol godes ƿundor sƿa þæt his geferan feollon geunmihte ⁊ mid fyrhte fornumene færlice þurh god ⁊ ðær com ridende sum egeful ridda ⁊ him mid siðedon tƿægen scinende englas mid ƿundorlicre ƿlite sƿa he sylf ƿæs geglenged ⁊ þæt heofonlice hors þe se heah-engel on sæt ƿearp sona adune þone dyrstigan heliodorum ⁊ þa tƿegen ænglas hine teartlice beoton on tƿa healfe him standende oð þæt he stille læg orƿene his lifes

Se ðe ær mid gebeote ⁊ mid micclū þrymme þrang into ðam temple

He læg ða dumb sƿa oð deaþ besƿungen ⁊ his frynd bædon þa þone fore-sædan onian þæt he his life geðingode æt þam lifigendan gode on þære frecednysse þe he on befeallen ƿæs

Onias þa eode ⁊ offrode him lac fore þam ælmihtigan gode on þa ealdan ƿisan ⁊ bæd þæt he miltsode þæs mannes nytennysse ⁊ þa englas þa hƿile heliodorum gespræcon | sædon þæt he sceolde þam sacerde onian mycclum þancian þæt he moste lybban ⁊ heton hine cyðan on his cyððe æt ham godes ƿundor on him · ⁊ ƿendon þa him fram

Heliodorus þa ge-edcucode ⁊ geoffrode his lac þam almihtigan gode mid incundre heortan þæt he cucu beon moste · ⁊ þancode onian ⁊ þanon ferde sƿa mid ealre his fyrde ⁊ þæs ælmihtigan mihte his hlaforde cydde · ⁊ his leodum eallum sƿa sƿa he sylf geseah · ⁊ hu he besƿungen ƿæs

Eft ða se cynincg axode heliodorum ⁊ cƿ̅

Hƿæne mage ƿe sendan to þam foresædan feo

Þa cƿ̅ heliodorus

Gif ðu hæfst ænigne feond send þone to þam feo ⁊ he bið ƿel besƿungen · oððe geƿisslice dead forðan ðe se ælmihtiga god mundað þa stoƿe ⁊ þa slihð ⁊ gescynt þe þær sceaðian ƿillað

Oft is gesƿutelod hu god gescylde þæt folc ƿið heora ƿiþer-sacan gif hi ƿurðodon hine ⁊ sƿa oft sƿa hi gebugon fram his biggengcum ahƿar þonne ƿurdon hi gescynde · ⁊ sƿyðe geƿitnode

Sy ƿuldor ⁊ lof þam ƿel-ƿillendan gode á on ecnysse ƿe cƿeþað · Amen.

Item alia.

qui sunt oratores, [sic @ Skeat] laboratores, [sic @ Skeat] bellatores.

Is sƿa-ðeah to ƿitenne þæt on þysre ƿorulde synd þreo endebyrdnysse on annysse gesette þæt synd laboratores · oratores · bellatores laboratores synd þa þe urne bigleafan besƿincað oratores synd þa ðe us to gode geðingiað bellatores synd þa ðe ure burga healdað ⁊ urne eard be-ƿeriað ƿið onƿinnendne here

Nu sƿincð se yrðlincg embe urne bigleofan ⁊ se ƿoruld-cempa sceall ƿin|nan ƿið ure fynd ⁊ se godes þeoƿa sceall symle for us gebiddan ⁊ feohtan gastlice · ƿið þa ungeseƿenlican fynd

Is nu for-þy mare þæra muneca geƿinn ƿið þa ungeseƿenlican deofla þe syrƿiað embe us þonne sy þæra ƿoruld-manna þe ƿinnað ƿiþ ða flæsclican ⁊ ƿið þa geseƿenlican [geseƿenlice] feohtað

Nu ne sceolon þa ƿoruld-cempan to þam ƿoruld-licum gefeohte þa godes þeoƿan neadian fram þam gastlican geƿinne forðan þe him fremað sƿiðor þæt þa ungeseƿenlican fynd beon ofer-sƿyðde þonne ða geseƿenlican ⁊ hit bið sƿyðe derigendlic þæt hi drihtnes þeoƿdom forlætan ⁊ to ƿoruld-geƿinne bugan · þe him naht to ne gebyriað

Iulianus se ƿiðersaca ⁊ se ƿælhreoƿa casere ƿolde neadian preostas to ƿoruldlicum gecampe ⁊ eac þa halgan munecas · ⁊ het hi on cƿearterne gebringan

Þa ƿearð appollonius se egiptisc[a] abbod on þam cƿearterne belocen · mid his geleaffullum gebroðrum ac godes engel him com to to þam cƿearterne nihtes mid heofonlicum leohte · ⁊ un-lǽc þæt cƿeartern

Eac se hundredes ealdor þe hi þær-inne beleac cóm on ærne mergen mid mycclum þrymme ⁊ sæde þæt his hus feolle færlice mid eorð-styrunge sƿa þæt his leofestan menn · þær lagon ofhrorene ⁊ he bæd þa halgan þa þæt hi þanon ferdon

And [sic @ Skeat] hi ða mid lof-sangum siþedon eft to þam ƿestene

Godes þeoƿas sceolon unscæððignysse healdan sƿa sƿa crist astealde þurh hine sylfne þa bysne þa þa he het petrum behydan his sƿurd ⁊ gehælde þurh his mihte | þæs mannes eare þe petrus of asloh · ⁊ gesƿutelode his godnysse

Nu se munuc þe bihð to benedictes regole ⁊ forlæt ealle ƿoruld-ðingc · hƿi ƿile he eft gecyrran to ƿoruldlicū ƿæpnum · ⁊ aƿurpan his geƿinn ƿið þa ungeseƿenlican fynd his scyppende to teonan

Se godes þeoƿa ne mæg mid ƿoruld-mannum feohtan gif he on þam gastlican gefeohte · forð-gang habban sceall

Næs nan halig godes þeoƿa æfter þæs hælendes þroƿunga þe æfre on gefeohte his handa ƿolde afylan ac hi for-bæron ehtnysse arleasra cƿellera ⁊ heora lif sealdon mid unscæþþignysse for godes geleafan · ⁊ hi mid gode nu lybbað forðan þe hí furþon noldon · ænne fugel acƿellan