Min herze hat minen sin

Min herze hat minen sin wilt ze iagen vs gesanc der vert nah mit minem mv̊te vil gedanke vert vor in den ist das vil wol bekant dc dc wilt stet in der hůte bi der der ich dienstes bin bereit ir sin ir mv̊t ir gedenken kan vor in mit kvnste wenken wol bedorft ich fvhse kv́ndekeit

Wie wirt mir dc stolze wilt dc ist snel wise vnd stark snel gedenken vert vor winde wiser sin bi menschen spilt sterke in lěwen sich ie barg der gelich ir mv̊t ich vinde ir snelheit mir wenket hohe enbor ir wisheit mich vberwindet mit ir sterke si mich bindet sus ir schöne torte mich hie vor

Truren mit gewalt hat gankert in mines herzen grunt da von hoher mv̊t mir wildet fröiden segel von mir gat werder trost ist mir niht kvnt sist mir in dem mv̊t gebildet wol versigelt vnd beslossen da sam der schin ist in der svnnen dv́ bant hant die kraft gewunnen dc sú breche niht des grifen kla

IR vil liehten ǒgen blig wirfet hoher fröiden vil ir grůs der git selde vnd ere ir schöne dú leit den strik der gedanke vahen wil des git ir gedanke lere mit zuht dc irs nieman wissen sol swes gedenken gegen ir swinget minne den so gar betwinget dc er git gevangen fröiden zol

Minne vert vil wilden strich vnd sv̊chet trúwen spor zv̊ der wirte wil si pflihten wunderlich si liebet sich si spilt im mit fröiden vor wunsches wils in gar berihten mit gedanken si im entwerfen kan wunneklich in sime sinne herzelieb von dem gewinne scheiden mv̊s swer trúwe nie gewan