Ich han das krúze an mich durh got genomen

Ich han das krúze an mich durh got genomen vnd var dan hin dur mine missetat nv helfen er mir svl ich her wider komen ein wib dú grossen kvmber von mir hat dc ich si vinde mit ir eren so gewert er mich mis willen gar sv́l aber si ir leben verkeren so gebe got dc ich· ê· vervar

Dv́ erste liebe der ich ie began dú selbe mv̊s ǒch mir dú liebeste sin an fröiden des ich dike schaden han ie doch so ratet mir dc herze min solte ich minnen me danne eine dc were mir niht gůt so minnet ich dekeine owe wie menger es doch tůt

Ich wil ir raten bi der sele min dvr dekeine liebe wan dvr dc reht wc möht ir an ir tugenden besser sin danne ob si ir vnrede liesse sleht tet an mir einvaltekliche als ich ir einvaltig bin an fröiden werde ich niemer riche es were ir der beste sin

Ich wande dc min kvmber wer erlitten darvf het ich gedingen menge zit noch hat mich gar ir frúndes grůs vermitten min gros gedinge ich wene da nider lit ich mv̊s als ê wilent flehen vnd ǒch me vnd hulfe es iht herre von wem ist dc min lehen dc mir niemer heil beschiht