Testament. [P. 95]

IL DONNA TOUT, CHASCUN LE SCET: TABLE, TRETTEAULX, PAIN, CORBILLON. POUR DIEU, DICTES-EN CE VERSET.

RONDEAU.

Repos eternel donne à cil, Lumière, clarté perpétuelle, Qui vaillant plat ny escuelle N'eut oncques, n'ung brin de percil. Il fut rez, chef, barbe, sourcil, Comme ung navet qu'on ree et pelle. Repos éternel donne à cil.

Rigueur le transmit en exil, Et luy frappa au cul la pelle, Nonobstant qu'il dist: J'en appelle! Qui n'est pas terme trop subtil. Repos eternel donne à cil.

CLXVI.

Item, je vueil qu'on sonne à branle Le gros Beffray, qui n'est de voire; Combien que cueur n'est qui ne tremble; Quand de sonner est à son erre. Saulvé a mainte belle terre, Le temps passé, chascun le sçait: Fussent gens d'armes ou tonnerre; Au son de luy tout mal cessoit.