Die gesponß Jesu seufftzet nach jhrem Bräutigam

Ach wan doch JESV liebster mein/ Wan wirft dich mein erbarmen: Wan wider zu mir kehren ein? Wan fassen mich in armen? Was birgest dich? Was kränckest mich? Wan werd ich dich vmbfangen? Wan reissest ein/ All meine pein? Wan schlichtest mein verlangen?

O wilkom süße Nachtigall Kombst mir zu rechter stunde: Erfrisch den lufft mit bestem schall Erschöpff die kunst von grunde. Ruff meinem Lieb/ Er nit verschieb; O JESV ruff mit kräfften; Ruff tausendtmahl/ Ruff ohne zahl/ Wer weiß es je mögt häfften.

Ach ruff/ vnd ruff. O Schwester zart Mein JEsum zu mir lade: Mir trewlich hilff zu diser fahrt; Dan ich in zähren bade. O schwester mein/ Sing süß vnd rein: Ruff meinem Schatz mit nahmen. Dan kurtz/ dan lang/ Zieh deinen klang: All Noten greiff zusamen.

Wolan; scheint mich verstanden hatt Die Meisterin in Wälden: Ihrs albereit geht wol von statt/ Die Färblein schon sich melden. In starker zahl Nun manches mahl/ Den Thon sie schon erhebet/ Weil auch der Schall Auß grünem Thall Ihr freundlich widerstrebet.

Da recht du fromme Nachtigall/ Du jenem schall nit weiche: Da recht/ du trewer widerschall/ Du stäts dich jhr vergleiche. Zur schönen wett Nun beyde trett/ Mein JESVM last erklingen; Ob schon im streit Der schwächsten seit Am Leben solt mißlingen.

Die Nachtigal den Schall nit kendt/ Vnd helts für jhr gespielin: Verwundert sich wies mög behendt So gleichen Thon erziehlen. Bleibt wenig stumm: Schlägt widerum: Denckt jhr bald obzusiegen: Doch widerpart Machts gleicher art/ Kein Pünctlein bleibt verschwiegē.

Bald steiget auff die Nachtigall Je mehr/ vnd mehr/ vnd mehre; Gleich folget auch der Widerschall/ Wans je noch höher wehre. Drumb zierlich fecht: Vnd starcker schlegt Daß Fräwlein reich von stimmen/ Steigt auff/ vnd auff/ Gantz ohn verschnauff: Doch thuts der Schall erklimmen.

Alßdan gehts vber Zihl/ vnd Schnur; Daß Hertz möcht sich zerspalten; Sie sucht eß in B moll/ B dur/ Auff allerhandt gestalten: Thut hundertfalt Den Baß/ vnd Alt/ Tenor/ vnd Cant durchstreichen; Doch Stimm/ vnd Kunst Ist gar vmbsonst/ Der Schall thuts auch erreichen.

Da kitzlet sie dan Ehr/ vnd Preiß Mit garzu scharpffen Sporen/ Erdenckt noch schön- vnd schöner weiß; Meint sey noch nicht verlohren. All muth/ vnd blut/ Vnd Athem gut Versamlet sie mit hauffen Wil noch zum Sieg/ In schönem krieg Mit letzten kräfften lauffen.

Ey da kracht jhr so mütigs hertz Gleich thon/ vnd Seel verschwindē Da leschet sich die gülden kertz/ Entzückt von starcken winden. O mütigs hertz! O schöne kertz! O wol/ bist wol gestorben. Die Lorber Cron/ Im letzten thon Du doch noch hast erworben.

Dan zwar ein Seufftzerlein gar zart Im todt hast lan erklingen/ Daß so subtil dein widerpart Mit nichten mögt erschwingen: Drumb ja nit lieg; Dein ist der Sieg; Daß Cräntzlein dir gebüret/ Welchs dir allein Von blümlein fein/ Ich schon hab eingeschnüret.

Ade dan falbe Nachtigal/ Von falbem todt entferbet: Weil du nun ligst im grünen thal/ Sag/ wer dein Sti ilein erbet? Könts ie nit seyn Eß würde mein? O Gott könt jchs erwerben! Wolts brauchen stät So früh/ so spät/ Biß auch im sang thet sterben.

Nun wil ich doch in diesem Wald/ Bey deinem grab verbleiben; Hoff mich mit jhren pfeilen bald Begierd/ vnd lieb entleiben. Will ruffen starck Zum todten sarck Biß mein Geliebter komme: Ein halten wil Mich in der still Biß letzt ich gar verstumme.