Die Gespons Jesu sucht jhren geliebten

Heint spät auff braunen Rappen Der Mon in starckem lauff/ Gundt mitternacht erdappen/ Mit ernsten triebe drauff: Nit manglets an Trabanten/ An Sternen klar/ vnd hell/ An gleichen Liechts-verwanten/ Welch jhn begleitet schnell.

Da fand ich mich entlassen/ Von wunder schwärem traum; Blickt auff zun blawen strassen/ Kent Mon/ vnd Sternen kaum. Baldt JESV dir von hertzen Ich schickt ein seufftzer tieff/ So gleich zun Hi iel-kertzen/ Recht auff in lüfften lieff.

Ach trewe Mon/ vnd Sternen/ Zeigt an den schönen Heldt; Von Euch ich mögt erlernen/ Wo schlaget er die Zelt? Mir thut von JESV sagen/ Wo rastet er zur ruh? Denck nit ohn grauß/ vnd zagen/ Waß mich geträumet nu.

O tochter jung von jahren/ Zu mir ein flä ilein sprach; Er seinen weißen Scharen/ Den Schäfflein folget nach: Er treibet sie zur waiden/ Zum grünen Erdgemüß/ Zum wasen vnderscheiden Mit vilen blümlein süß.

Schaw dorten jetzt im Garten/ Am Oel- bekandten Berg/ Er jhnen auß thut warten/ Vnd weidets vberzwerch. Dort findens vnverdrossen Auch tranck bey schönem graß/ Weil Cedron kombt geflossen Zu nechst in feuchter straß.

Danck habt jhr schöne Sternen/ Ihr gülden fräwlein rein/ Von euch daß möchte lernen/ Wo sey der liebste mein. Treibt er die Schaaff zur waiden/ Zum grünen Erd-gemüß? Zun wasen vnderscheiden/ Mit vielen blümlein süß?

Vnd treibet ers in Garten/ Am Oel-bekandten Berg? Thut er dort jhrer warten/ Vnd weidets vberzwerch? Wolan in eyl geschwinde Mich wil dan machen auff: Den jüngling biß ich finde/ Wil reysen ohn verschnauff.

Zum Garten alß ich kame/ O wee/ was angst vnd noth! Der Hirt schon vrlaub nahme/ Sich schickt sogar in Todt. Daß leben auff der schwellen/ Auff offnen lefftzen saß/ Sich that zum scheiden stellen/ Gesann der duncklen straß.

Ab falber Stirn/ vnd Wangen/ Füß/ händen marmer-weiß/ Die tropffen anher drangen/ Von weiß/ vnd rothem schweiß. O liebster mein auff Erden O JESV schöner hirt! Ach wie nun/ was geberden? Sag an/ waß immer wird?

Wer thäte dich erschröcken? Sag an/ was dir geschehn? Ich schwör bey deinem stecken/ Bei dir wil trewlich stehn. Bei dir ich wil verbleiben/ Sag an wers dir gethan? Vnd solt man mich entleiben/ Von dir nit wil ich lan.

Drauff band ich jhn in Armen/ Küßt jhn mit süßem truck; Gleich schallet ein Alarmen; Da wand ich mich zu ruck/ Alß vil mich kond vmbgreiffen Mit meinen augen beyd/ Ich mörder sah durchstreiffen Die Felder weit und breit.

Beyn Fackeln/ vnd Laternen/ Ein Rott gewaffnet gantz/ Von waffen gab von fernen Gar breiten eysenglantz. Bald ruckten sie zum Garten/ O wee dem liebsten mein! Mit Spiessen/ Beyl/ vnd Barten/ Zur thür sich drangen ein.

Zugleich mit zähnen kirrten/ Grißgrammten vngeschewt: Den halber todten hirten Sie grieffen an zur Beut. O wee/ mir nun geschwindet/ Mirs hertz in stuck zerbricht; Ach nit/ nit jhn doch bindet/ Den jüngling greiffet nicht.

Ach schonet seiner haaren/ Der gülden haaren sein: Ach schonet seiner Schaaren/ Der zarten Lämmerlein. Wer will nach ihm dan weiden Die Schäfflein silber-weiß? Nun wird vnunderscheiden/ Daß wüllen völcklein preiß.

Schaw dorten schon ins wilde Die wollgebleichte Schaar/ Sich gar ohn schutz/ vnd schilde Verwicklet in gefahr. Ach schonet nur der herden/ Der Hirt auch selber schrie: Mit mir laß euch gewerden/ Sprach Er/ mich schawet hie.

Mich greiffet/ schleiffet/ schlaget/ Ja mich nun schlachtet gar: Nur nit/ ach nit verjaget Die reine wüllen schaar. Nur mich zum todt/ vnd leiden/ Mich reisset ohn verbott/ So nur mag friedlich weiden Die Silber-schöne Rott.

Last frey die Schäfflein lauffen Die Schwanen-weiße zucht/ Last gehn den schönen hauffen/ So nur man mich gesucht. Den Todt ich mir wil kiesen Für meine Lämmerlein: Ade nun waid/ vnd wiesen/ Eß muß gestorben sein.

O JESV du so wunder/ Vnd wunder guter Hirt! O warlich mit besonder Begird/ vnd lieb geziehrt: Wiltu den todt erkiesen Für deine Lämmerlein? Vnd lassest waid/ vnd wiesen/ Weils muß gestorben sein?

Ey da will dich begleiten/ Du gut- vnd bester Hirt: Weich nit von deiner Seiten Gott geb waß widerfihrt. Waß nemblich ich erblicket Zuvor in schwärem traum/ Walt Gott/ sichs nunmehr schicket Zum Creutz vnd galgenbaum.