Eine Christliche Seel redet von dem Creutz

Manche stunden JESV wunden Ich mir setz ob augen mein. Thu mich wenden zu den händen Zu der seit- vnd füssen sein. O du bester/ Creutz baläster! Ich dan ruff in aller eyl. O zur stunde mich verwunde/ Schieß herab die nägel-keyl.

Mich gesunden ohne wunden/ Laß mit nichten dannen gahn. Recht nur zörne/ mir die dörne Lantz/ vnd nägel werff hinan. Mich nur quäle/ nit verfehle Meiner hände/ füß/ vnd seit: O mich Cröne/ nit verschöne; Wil mit JESV tragen leydt.

Keine beissel/ keine meissel/ Keine stahl- noch eysen-spitz/ Meinen glieder/ hoch/ noch nider/ Werden geben solche schlitz/ Alß die nägel/ stumpffe kägel/ Lantzen/ geissel/ scorpion/ Han zergerbet/ vnd zerkerbet Jhn/ den wahren Gottes sohn.

Seine qualen/ ich zumahlen Fleissig hab in stäter hut: O elende/ füß/ vnd hände/ Seit/ vnd Cörper voller blut! Reichlich schweissen/ scheinbar gleissen Alle wunden/ alle streich. Schaw/ nun fliesset/ vnd sich giesset Purpur/ vber marmer bleich.

Auß der seiten/ lan sie leiten Rothe stralen wie Corall: Auß der seiten/ lan sie leiten Weisse wässer wie Crystall. O du reines/ hüpsch/ vnd feines Bächlein von Corall/ vnd glaß! Nit noch weiche/ nit entschleiche/ O rubin/ vnd perlen gaß.

Ach verweile/ nit noch eyle/ Wil nun hie mich setzen bey; Wil da baden meinen schaden Ob er schon veraltet sey/ Kräfftigs plaster meinem laster/ Wil ich dorten salben drauß/ Wil dan gründen tieff zun sünden/ Sie von jhnen waschen auß.

Bey den füssen wil ich büssen/ Vnd auß meinen augen beyd Wol sie netzen/ vnd ersetzen Waß von blut herausser geit. Wil mit zähren widerkehren/ Gleich als vil entfliessen wird/ Vnd mit sattem guß erstatten/ Was von purpur da vergirt.

Doch jhr bronnen/ wol beronnen/ Schon beschenckt ist erd/ vnd graß: Ach verschnauffet/ nit so lauffet/ Nit so giret ohne maß. Schon an laugen meiner augen/ Schon an zähren mirs gebrist; Thut euch stillen; wer kan füllen/ Was bereit verflossen ist?

Zu den händen/ wil ich senden Hundert tausent seufftzer lind/ Sie durchwülen/ vnd erkühlen Mit so lindem hertzen wind. Mit so linden hertzen winden Wil ich trücknen allen schweiß/ Alle masen wil durchblasen/ Kühlen alle wunden heiß:

Doch zur stunden/ auch lig vnden/ Ich zu wenig seufftzer find; Bin von wunden vberwunden/ Mir gebrichts an hertzen wind. Häuffigs windē macht mich schwindē/ Kaum ich mehr den athem hab/ Seufftzen/ weinen/ O der peinen! Mich noch bringen gar ins grab.

In der cronen/ dacht zu wohnen Mein so gar betrangtes hertz; Dort in hecken/ sich verstecken/ Sich bezäunen aller werts. In den spitzen dörnen sitzen Schon es auch ein zeitlang blieb/ Thät sich freyen vor den weysen/ Vor dem schnöden seelen dieb.

Doch nun wider bald hernider Zu der holen seit begerts/ Wil sich setzen/ vnd ergetzen/ Jesu/ neben deinem hertz. Es nun dorten/ jene pforten/ Jene rothe seiten-thür/ Wil verwahren/ sich nit spahren/ Da die schiltwacht halten für.

O du runde seiten wunde! Reich- vnd edler hertzen-kast! Bey dir sterben/ vnd erwerben Hofft es waren fried/ vnd rast. Da laß walten/ vnd laß schalten; Da nun laß es haben platz: Laß es wachen/ vnd auch machen Da sein bettlein/ vnd matratz.

Bey der seiten/ seine zeiten Wird es wachen ohne verdruß: Bey der seiten/ seine zeiten/ Auch es wider schlaffen muß. Bey der seiten/ seine zeiten Singen/ vnd es klingen will: Bey der seiten/ seine zeiten Es auch wider schweigen still.

Drumb auß liebe/ nun ich gibe/ JESV/ dir es eygen gantz. Jhm wil schaffen/ deine waffen/ Deine nägel/ deine Lantz. Darmit streitten vor der seiten Wird es gen die laster sein. Biß mans leite von der seite Zu den außerwöhlten dein.