Gelebt ich noch die lieben zit

Gelebt ich noch die lieben zit dc ich dc lant solte beschowen darinne al min fröide lit nv lange an einer schonen frǒwen so gesehe min lip niemer weder man noch wib getruren noh gewinnen rowen mich dvhte nv vil maniges gv̊t da von ie swere was min mv̊t

Ich wande ir e· vil verre sin da ich nv vil nahe were alrerste hat dc herze min von der frömde grosse swere es tůt wol sin trúwe schin wer ich iender vmb den rin so friesche ich lihte ein ander mere des ich doch leider nie vernam sit dc ich vber die berge kam

Ich sage ir nv vil lange zit wie sere si min herze twinget als vngelǒbic ist ir nit dc si der zwiuel darvs bringet dc si hat als selhen kip den ze rehte ein selig wib niemer rehte vol bringet dc si dem vngelônet lat der si vor al der werlte hat

Nieman sol mir dc verstan sine möhte mich vor eime iaere von sorgen wol erlöset han ob es der schonen wille were ǒch half mir sere ein lieber wan swanne si min ǒgen san dc wc ein fröide fúr die swere alleine wil sis gelǒben niet dc si min ǒge gerne siet