Ich denke vnderwilen

Ich denke vnderwilen ob ich ir nahe were was ich ir wolte sagen das kvrzet mir die milen swenne ich ir mine swere so mit gedanken mac klagen mich sehent ze mengen tagen die livte in der gebere als ich niht sorge múge tragen des mv̊s ich verzagen

Het ich so hoher minne mich nie vnderwunden min möhte werden rat ich tet es ane sinne des lide ich zallen stvnden not dv́ mir nahe gat min stete mir nv hat dc herze also gebvnden dc si es niht scheiden lat von ir als es nv stat

Es sint grosse wnden die ich allersereste minne dú wc mir ie geve ich wúnsche in kurzen stunden dc niemer man gewinne kvmber der also nahen ge erkennen wande ich in e nv han ich in bas befvnden mir wc daheime we vnd hie wol dristunt me

Swie kleine es mich veruahe so fröwe ich mich doch sere dc mir nieman erwern kan ine gedenke ir nahe swar ich landes kere den trost sol si mir lan wil sis fúr gůt enpfan des fröwe ich mich iemer mere wan ich fúr alle man ir ie wc vndertan