« Nos peres devanciers ont mis communement »

Nos peres devanciers ont mis communement Aus lieus plus frequentez des citez emperieres, Pres des temples sacrez les tristes cimetieres, De nostre infirmité fidelle enseignement :

Afin que par l'objet de tant de monument D'ossement, de convoy, d'epitaphe, & de bieres Nous fussions avertis que les tombes meurdrieres Consumeroient nos cors sujet à changement.

Ayons doncques toujours en l'ame & en la bouche Le penser de la mort, & ce monstre farouche Sur nous eslancera plus doucement ses cous.

Ainsi des fiers lions la furieuses engeance Par conversation, & longue accoustumance S'apprivoise à la fin, & se joüe avec nous.