Sonnet XVIII (Ne vous estonnez point si mon…)

Ne vous estonnez point si mon esprit qui passe De travail en travail par tant de mouvemens, Depuis qu’il est banni dans ces esloignemens, Tout agile qu’il est ne change point de place.

Ce que vous en voyez, quelque chose qu’il face, Il s’est planté si bien sur si bons fondemens, Qu’il ne voudrait jamais souffrir de changemens Si ce n’est que le feu se peust changer de place.

Ces deux contraires sont en moy seul arrestez Les foibles mouvemens, les dures fermetez : Mais voulez vous avoir plus claire cognoissance

Que mon espoir se meurt & ne se change point ? Il tournoye à l’entour du poinct de la constance Comme le ciel tournoye à l’entour de son poinct.