Le débat dou Cheval et dou Levrier

Froissars d’Escoce revenoit Sus un cheval qui gris estoit ; Un blanc levrier menoit en lasse. « Las ! dist le lévrier, je me lasse. » Grisel, quant nous reposerons ? » Il est heure que bous mengons. — « Tu te lasse, dist li chevaus ; » Se tu avoïes mons et vauls » Porté un homme et une male, » Bien diroïes : Li heure est male » Que je nasqui onques de mère. » » — Dist li levriers : C’est chose clère ; » Mes tu es grans, gros et quarrés, » Et as tes quatre piés ferrés ; » Et je m’en vois trestous deschaus ; » Assés plus grans m’est li travauls » Qu’à toi, qui es et grans et fors, » Car je n’ai qu’un bien petit corps. » En ne m’appelle-on un lévrier » Fais pour le gens esbanoyer ; » Et tu es ordonnés et fès » Pour porter un homme et son fès.

» Quant nous venrons jà à l’ostel, » Nos mestres, sans penser à el, » Il t’aportera del avainne ; » Et s’il voit qu’aïes éu painne, » Sus ton dos jettera sa cloque, » Et puis par dalès toi se joque. » Et il me fault illuec croupir. » Il ne me vient point à plaisir. » — Je t’en crois bien, respond Griseaus ; » Tu me comptes bien mes morseaus, » Mès je ne compte point les tiens. » Pleuïst Dieu, que je fuisse uns chiens » Ensi que tu es par nature ; » S’auroïe dou pain et dou bure » Au matin, et la grasse soupe. » Je sçai bien de quoi il te soupe. » S’il n’avoit qu’un seul bon morsel, » Ta part en as-te en ton musel ; » Et si te poes par tout esbatre. » Nul ne t’ose férir ne batre. » Mès quant je ne vois un bon trot, » Jà n’en parlera à moi mot, » Ains dou debout de ses talons » Me frera de ses esporons, » Si qu’à la fois me fait hanir. » Se tu avoïes à souffrir » Ce que j’ai par Saint Honestasse » Tu diroïes acertes, lasse ! » — Dist le chien : « Tu te dois bien plaindre ! » Ains qu’on puist la chandelle estaindre,

» On te frote, grate et estrille, » Et te cuevre on, pour la morille, » Et si te nettie-on les piés. » Et s’on voit que tu soies liés » On t’aplanoïe sus le dos, » Et dist-on : Or, pren ton repos, » Grisel, car bien l’as desservi » L’avainne que tu menges ci. » Et puis on te fait ta littière » De blanc estrain ou de fléchiere » Là où tu te dois reposer. » Mès j’ai aultre chose à penser ; » Car on me met derrière un huis, » Et souvent devant un pertuis, » Et dist-on : Or garde l’ostel. » Et se laïens il avient tel, » Que bien j’en ai toutes les tapes ; » Car, s’on envolepe ens ès nappes » Pain, char, bure, frommage ou let, » Et la meschine ou li vallet » Le mengüent, par aucun cas, » Sus moi en est tous li debas ; » Et dist-on : Qui a ci esté ? » Cils chiens ! Et je n’ai riens gousté. » Ensement sui, sans ocquison » D’estre batus en souspeçon. » Mès on ne te requiert riensnée, » Fors que bien faces ta journée. » Si te pri cor, avances toi, » Car droitement devant nous voi

» Une ville à un grant clochier. » Nos mestres y vodra mengier ; » Tu y auras là del avainne, » Et je aussi prouvende plainne. » Si te pri, et si le te los » Que tu y voises les galos. » » — Respont Griseaus : Ossi ferai-je » Car de mengier grant talent ai-je. »

Froissars atant vint à la ville Et là faillirent leur concile.