De Poetarum Amoribus Ad Gordium

Gordi, plus oculis amate nobis, Quicquid Lesbia, Delia, et Corinna, Quicquid Cynthia, quicquid et Lycoris, Quicquid Stella, Nina, et recens Neæra, Laura, et Candida, vel fuit Gelonis, (Ut nostras quoque nominem puellas) Cassandra æmula Laureæ puellæ, Quicquid Pasithea, et venusta nuper Mellina, et numenis Oliva nostris Dicta (si locus inter has Olivæ) Hoc Faustina mea, hoc mea est Columba. Hoc Faustina tua, hoc tua est Columba:

Ob id nunc cupiam hîc adesse, Gordi, Et quicquid cecinit tener Catullus, Et quicquid cecinit tener Tibullus, Quicquid Naso canit, Propertiusque, Gallus, et Jovianus, Actiusque, Quicquid ipse Marullus, et Petrarca, Quicquid Beza canit, canit Macrinus, (Ut nostros quoque nominem poëtas) Ronsardus gravis, et gravis Thyardus, Mollis Baifius, mihique (si quis Probatos locus inter est poëtas) Optarim veteres meos calores, Gordi, ut sic melius queam referre, Faustinamque meam, et meam Columbam, Faustinamque tuam, et tuam Columbam.