Winter wil vns iarlanc me

Winter wil vns iarlanc me twingen heide vnd ǒch den walt vnd dar zv̊ den grünen kle machet er gar vngestalt voglin twinget sin gewalt das klage ich vnd da bi me dc dv́ schone ist mir geve die ich von herzen minne Genade ein venus kv́nigin din eigen diener wil ich sin hilf dc ich trost gewinne

IR múndel rot ir wengel schin vnd ir lip gar wol gestalt dc ich dem mv̊s fremde sin des wirt ich in sorgen alt si begat an mir gewalt vnd súndet sere sich dc si svs verderbet mich an herzen vnd an sinne Genade ein venus kv́nigin din eigen diener wil ich sin hilf dc ich trost gewinne

Genade minnekliches wip noch lant mich úwer hulde han gedenkent dc min sender lip dienstes úch ist vndertan des svlt ir mich geniessen lan al so dc ir tröstet mich genade frowe minneklich mins herzen kv́niginne Genade ein venus kv́nigin din eigen diener wil ich sin hilf dc ich trost gewinne